WILLEMSTAD.- Gran eks-dirigente lokal i internashonal di atletismo Anthony Minguel, ayera nochi di forma ofisial a risibí su pin komo miembro di Salon di Fama di FDOK. Seis aña pasá e veterano dirigente a keda introdusí den Salon di Fama, pero e no por tabata presente na Kòrsou i na e okashon ei a keda representá pa Erwin Martis, otro gran eks-dirigente di atletismo.
Ayera nochi na okashon di kampionato di atletismo di Kòrsou i probechando dje echo ku Anthony Minguel ta na Kòrsou, FDOK a pone spotlight riba su persona. Kompañá pa vários otro veterano dirigente di atletismo di e bon tempu di Tonchi Minguel, e akto ofisial a tuma lugá den Stadion Ergilio Hato.
Orlando Cuales na e okashon ei a referí na e karera impreshonante dje dirigente deportivo aki, kende a haña su formashon komo tékniko di atletismo na Springfield College, siguí despues pa vários kurso na kua el a asistí na e.o. Hulanda, Italia, Mexico, Pto. Rico.
Na Kòrsou e tabata fundador dje klup Olympic, tambe e tabata presidente di un federashon regional di atletismo, mas aleu a duna kurso di hurado, etc., etc. Pues un persona ku su bida tabata dediká na e deporte di atletismo.
Manera presidente di FDOK Jean Francisca a trese dilanti, sin duda Anthony Minguel ta un bon ehèmpel pa nos deportistanan.

...Anthony Minguel kompañá pa vários veterano dirigente di atletismo kendenan a para na kuna di lantamentu di federashon nashonal dje deporte i kendenan durante di dékadanan largu a sirbi e deporte...