WILLEMSTAD.- Un di e metanan mundial di Lions International ta ayudo na personanan ku desabilidat visual. Klupnan di servisio Lions rònt mundu ta hasi diferente proyekto pa duna un aporte na e grupo spesífiko aki. Curaçao Lions Club sigur no ta keda atras.
Resientemente Curaçao Lions Club a keda aserká pa e Distrito N35 (South Florida i Bahamas), pa manda un representante di Kòrsou na e di  ‘X Festival Internacional de la Canción para Personas con Discapacidad Visual’ ku ta tuma lugá na Guatemala dia 28 di yüli 2018 próksimo na Teatro Bellas Artes.
Partisipashon na e festival internashonal aki no solamente ta algu grandi pa Kòrsou pero ku nos partisipashon tambe nos ta promové internashonalmente kuido i envolvimentu sosial di personanan ku desabilidat visual riba nos isla. Curaçao Lions Club a skohe distinguido señor Romeo Heije pa representá nos dushi isla i huntu ku Fundashon Pro Bista i Curaçao Tourist Board den korto tempu a logra regla tur kos pa señor Romeo Heije huntu ku su kompañante biaha pa Guatemala.  Señor Romeo Heije lo partisipá na e festival ku dos kansion: 1) ‘Te necesito tanto amor’ (Elio Roca) i 2) ‘Patria Stimá’ (Ced Ride). Algun pais ku tambe ta partisipá ta entre otro Estádos Unídos, Cuba, Panama, Costa Rica, Nicaragua, Honduras, El Salvador i Guatemala.

Biografia
Biografia di Romeo Heije ta sumamente ekstenso i impreshonante. For di chikí e tabata stima músika i a siña toka diferente instrumento musikal manera trompèt, kitara i drùm. El a studia 3 aña músika na konservatorio na Arnhem Ulanda i a siña kanta segun e método di Bel Canto. El a kanta den diferente banda manera Super Special Combo, Doble R Super Special Stars i El Indiscutible Super Dynamic.
E ta ganador na 3 okashon di Festival Voz di Oro Curaçao i a representá Antia na Festival di OTI na 1987 na Lisboa, Portugal. El a gana Golden Award na Caribbean Broadcasting Union Festival na Barbados i na 1975 el a gana mihó voz na ‘Festival Internacional de la voz i canción’ na Puerto Rico.
Na Kòrsou su trayektoria komo músiko i kantante ta kontinuá paso e ta duna lès di muzik na diferente skol i internat.

Awendia e ta sigui duna presentashon i ta duna lès di músika na miembronan di Fundashon Pro Bista i e ta fungi komo direktor musikal, basista i kantante den e banda Orkesta Pro Bista.
Señor Victor Libiee lo biaha huntu ku Romeo i su akompañante pa representá tantu Curaçao Lions Club i Fundashon Pro Bista. Curaçao Lions Club ta kontentu i gradesido na e kontribushon balioso di Fundashon Pro Bista i Curaçao Tourist Board pa hasi e biahe di Romeo Heije i su kompañante pa Guatemala posibel.}
Curaçao Lions Club huntu ku Fundashon Pro Bista i Curaçao Tourist Board a hasi entrega di bandera di Kòrsou pa e biaha kuné pa Guatemala. Huntu nan ta deseá señor Romeo Heije hopi éksito na e di ‘X Festival Internacional de la Canción para Personas con Discapacidad Visual’.