WILLEMSTAD.- Djamars awor lo tin otro show super great riba Freewinds, na momentu ku e artista internashonal i di nòmber Stacy Francis lo presentá pa pueblo di Kòrsou.
Stacy ta un tremendo kantante i aktris ku a gira rònt mundu i a subi diferente esenario den produkshonnan musikal grandi i tambe a yega di aparesé den diferente programa di televishon manera p.e.: Third Watch (NBC), Half and Half. The Parkers (UPN), Yes Dear (CBS), Phil of the Future (Disney), Fastlane (FOX), Son of The Beach (FX)  i tambe In My Opinion (WB).
Tambe el a  yega di presentá en bibu den The Rosie O'Donnell Show, Showtime At The Apollo, Soul Train and The Macy's Thanksgiving Day Parade.
Stacy a keda di presentá tambe riba Broadway den e show di Boys Choir of Harlem and Friends  i tambe a yega di aparesé den  Girlfriend,  un pelíkula di televishon ku a keda produsí pa Oprah Winfrey.
Tambe ta bon pa informá ku Stacy  tabata un dje finalistanan den e kompetensia di talento den e promé X Factor. Si kantamentu tabata un kompetensia Olímpiko, Stacy Francis lo a gana medaya di Oro.

The Freewindsband i NGN Brazz
Banda di The Freewinds Band, NGN Brazz tambe lo ta presentá pa forma parti di e tremendo show aki djamars awor. NGN Brazz ta forma pa Norbert Girigorie, Giovanni Atalita i Norman Kooks. E siman aki pa motibu di otro kompromiso, Norman Girigorie no por ta presente i lo keda remplasá pa un otro músiko talentoso di Kòrsou.

Entrada grátis
Manera a bira kustumber, entrada pa e konsierto nan ku Freewinds mes ta organisá ta grátis. E show ta kuminsá eksaktamente 8 pm i p’esei nos ta pidi tur hende pa nan tei for di 7:30 pa asina ei nan por subi i presensiá un tremendo show.
E barku Freewinds djamars awor dia 19 di desèmber  lo mará na Nieuwe Werf ku ta keda pasando na Panamá bai abou. Pa bo  keda registrá pa un o mas asiento den e show aki, manda un app na  +59995130837  i bisa kuantu lugá bo tin mester. Tur esnan ku den pasado a yega di bai e shownan riba Freewinds sa kon bon e ambiente aki sa ta. E number +59995130837 ta únikamente pa manda app, ya ku e no ta risibí yamada.