WILLEMSTAD – Manera ta ampliamente konosí, e siman aki e MLB Curaçao Elite Program a ranka sali ku partisipashon di 35 hóben pelotero lokal di diferente organisashon.

Aktualmente tin un staf di 7 persona di Major League Baseball (MLB) ku ta Kòrsou pa guia e hóbennan aki den e programa piloto. E training di e grupo di 35 ta tuma lugá tur djaluna, djárason i djabièrnè na Tio Daou Ballpark. Riba e e dianan liber djamars i djaweps ta e intenshon pa e kuerpo tékniko bishita diferente organisashon di Little League rònt Kòrsou. Esaki tabata e kaso tambe ayera ora ku e representantenan di MLB a bishita e organisashon di Trai Seru na Sabana Ballpark.

Un total di 6 coach a traha ku sigur 40 hóben di edat 8 pa 12 aña. E coachnan presente pa MLB ayera tabata Denio Gonzalez, Emilio Acosta, Cristobal Colon, Temistocle Liendo, Luis Colemenares i coach di kondishon, Jeff Krushell. Presidente di e organisashon di Trai Seru, Lando Chirino tabata sumamente kontentu ku presensia di e kuerpo tékniko di MLB aki serka nan.

“Tabata un tremendo oportunidat pa e hóbennan.” Chirino a splika tambe ku ta e intenshon pa despues nan bai yuda e diferente selekshonnan di Kòrsou tambe. Ta e intenshon pa sigui bishita mas organisashon, djamars otro siman nan lo ta na Sta. Maria i djaweps serka e organisashon di Brievengat. Otro organisashonnan ku ta interesá pa e staf di MLB hasi un bista serka nan por tuma kontakto ku hefe di delegashon, Jimmy Meayke na Jimmy.Meayke@mlb.com òf na +1 (646) 258-7941 (via whatapp mas fasil).

E proyekto aki ta posibel danki na MLB, Curaçao Baseball Development Foundation i CTB.