MERKA.- E hòmber ku na dos okashon a kibra i drenta den e apartamentu di Taylor Swift na New York a keda kondena na kastigu di prisòn.
Roger Alvarado, manera su nòmber ta, mester sinta 4 aña di kastigu. E hues a hala su atenshon indikando ku bou di niun sirkunstansia e no tin por tin kontakto ku Swift.
Alvarado dia 7 di mart último a drenta e kas di Taylor na SoHo. A mir’é riba imágennan di kámara ku a mustra ku el a usa un trapi pa subi i bula e kura i baha den e patio dje kas.
Despues di esaki, e hòmber a kibra un porta di glas, loke a ser kalkulá na un daño di 4 mil dòler. E ekipo di seguridat a nota e moveshon i mesora a notifiká polis. Despues di algun minüt e polisnan a detené Alvarado riba e patio.
E kaso aki a tuma lugá despues ku algun luna promé el a wòrdu lagá den libertat despues di a sinta 6 luna den prisòn, esaki pa motibu di un kastigu pasó den luna di aprel 2018 el a drenta kas di e kantante. Na ámbos okashon ku e hòmber a drenta e kas e kantante no tabata na kas.
Segun Alvarado, “Mi kier a gewon papia kuné, e ta parse mi un persona simpátiko i cool”.