WILLEMSTAD.- Tin biaha sirkunstansia di bida ta pone ku bo ta atmirá un hende djaleu, pero bo no por formulá e palabranan pa aserká. Den ‘Kombersá ku Kuné’, esei ta e dilema di e protagonista ku ke purba kapta atenshon di un damita bon bala. Den e kansion, Stanley Clementina ta motiv’é pe tin kurashi i ta atvertí p’e no rabia ora otro pasa su dilanti i bai kuné. ‘Kombersá ku Kuné’, ta e di sinku produkshon di Stanley Clementina, unda riba un manera humorístiko, e talentoso kantante i kompositor, ke motivá bo pa no laga niun chèns bai, pasó despues lo bo lamentá. “Tin hopi hòmber ku ta para wak i atmirá un dama, pero nunka ta hasí algu. Nan no ta ni aserk’é i dun’é un kòmplimènt”, Stanley a splika. “Nan ta keda wak i hari so”. E kansion tambe ke ilustrá un dinámiko simbóliko, unda e muhé ta representá bida real. Hopi biaha nos por laga un oportunidat bai, pasó nos no ke tumá un kurashi. ‘Kombersá Kuné’ a keda komponé pa Stanley, di meks pa produktor Zurich Musiq, i e clip a keda dirigí pa Cineterra. Mientrastantu, e albùm di Afrobeat tan antisipá di Stanley, titulá YDK, ta kla. YDK lo sali dirèkt despues di Festival di Tumba 2018. Pa promé biaha Stanley lo partisipá n’e festival, manera ya ta tradishon pa vários artista kurasoleño di tanda. Ya tin hopi antisipashon pa e tumba di Stanley, ku e mes a skirbi, produsí i komponé. E areglo di e tumba a keda kompletá huntu ku e talentoso músiko i areglista Derryl ‘Titi’ de Palm. Durante e dianan di fiesta, Stanley lo ta na Kòrsou algun siman, unda e lo tin vários presentashon. Dia 30 di desèmber lo e presentá na Sta. Barbara, i dia 4 yanüari lo e ta na Club 973, na Mambo Beach. ‘Like’ su Facebook.com/StanleyAcoustic pa keda na altura di tur demas presentashon. Pa presentashon, mail steezmusic@gmail.com of chéck www.stanleyclementina.com Por chéck e video di ‘Kombersá ku Kuné’ riba YouTube na e siguiente link: https://www.youtube.com/watch?v=T_oDgzdkFMk&feature=youtu.be