WILLEMSTAD.- Stanley Clementina ta wak bèk riba 2018 ku satisfakshon, unda el a marka pouta ku vários kansion ku a bira hit na Kòrsou, Aruba i Boneiru. Manera el a primintí fo’i kuminsamentu di aña, e talentoso kantante, kompositor i areglista porfin ta deleitá nos ku YDK,  su promé  EP ku ta konsistí di hitnan manera ‘Komehein, ‘Basil’é’ i ‘Kulpa mi Numa’.
Pero riba YDK  tambe tin algun kansion nobo manera ‘You Wine It’, ‘T’asina Ta Biba’ i ‘Mama Told Me’ ku Ori, kual su video clip lo sali pronto. Tur kantika riba YDK a keda komponé i skibi pa Stanley mes, pero tambe Stanley a kolaborá ku vários produktor di renombre manera Zurich Musiq, kende a produsí vários hit pa Broederliefde, i MB Ghettoflow, un di e produktor di reggaetón mas buská di Europa.
Riba YDK, Stanley a kolaborá ku algun artista kurasoleño talentoso manera  Dayo (Strea Nobo) riba ‘T’asina Ta Biba’, kantante di Urban Dopie riba ‘Basil’é’, i Muisjemuis riba ‘Kulpa Mi Numa’. Pero e chèri riba e bolo ta e 'remix' di e hit ‘Komehein’ huntu ku e famoso rapper Dongo. E ‘remix’ aki ta solamente optenibel riba YDK riba vários plataforma digital musikal, na tur diskobar popular òf despues di Stanley su presentashon nan.
Dia 28 di desèmber próksimo, Stanley lo lansa su álbum YDK na Ulanda huntu ku su banda C-Shaw, pero ta premirá di regresá Kòrsou na 2019 pa algun presentashon banda di vários proyekto eksitante.

Un 2019 alentador
Stanley a kaba di haña e título i sosten di Fonds Podium Kunsten, unda el a haña un supsidio pa internashonalisá papiamentu ku músika ora aña habrí, Stanley lo lansa un kolaborashon ku Muisjemuis i Richie Rich, pa despues bai New York na mart pa hasi algu presentashon. Despues di esaki, Stanley lo lansa un bomba huntu ku Jandino i Dongo. Na  yüli/ ougùstùs 2019 Stanley ta plania pa bishita Nashville, Memphis i Chicago pa topa ku produktor i kompositor kondekorá, Tommy Sims.
Pidi na tur radio emisora i televishon popular pa Stanley su delaster produkshon ‘Papia Mi Bon’ i tambe pidi pa e remix di‘Komehein’ ku Dongo.
‘Like’ su Facebook.com/StanleyAcoustic òf mail steezmusic@gmail.com pa mas informashon. Bishitá www.stanleyclementina.com  pa keda na altura di futuro presentashon.