WILLEMSTAD.- Despues di a lansa e kantika ‘Kombersa ku Kuné’, Stanley Clementina ta sumergí den e preparashonnan pa Festival di Tumba 2018. Ta e promé biaha ku e talentoso kantante i kompositor ta partisipá na e festival históriko, kual a bira un ruto di pasahe pa tur artista kurasoleño di tanda ku ke laga su marka.
Durante e dianan di fiesta na Kòrsou, Stanley a presentá na vários establesimentu manera Karákter i Sta. Bárbara i fiestanan popular manera Jet Set.
Ya tin hopi antisipashon pa e tumba di Stanley, ku e mes a skirbi, produsí i komponé. E areglo di e tumba a keda kompletá huntu ku e talentoso músiko i areglista Derryl ‘Titi’ de Palm, i Stanley lo keda kompañá pa e banda ONE.
“Aunke mi no por divulgá hopi, mi tumba lo tin un mensahe bunita i alabes lo laga bo pensa. Tambe lo bo rekonosé mi signatura Afro den mi komposishon, kual lo pone un i tur riba pia”, Stanley ta primintí.
Mientrastantu, e albùm di Afrobeat tan antisipá di Stanley, titulá YDK, ta kla. YDK lo sali dirèkt despues di Festival di Tumba 2018 i lo inkluí ‘Kombersá ku Kuné’, kua ta e di sinku produkshon di Stanley komo solista.
Segun Stanley, tin biaha sirkunstansia di bida ta pone ku bo ta atmirá un hende djaleu, pero bo no por formulá e palabra nan pa aserk’é. Den ‘Kombersá ku Kuné’, esei ta e dilema di e protagonista ku ke purba kapta atenshon di un damita bon bala. Den e kansion, Stanley ta motiv’é, riba un manera humorístiko, p’e tin kurashi i ta atvertí p’e no rabia ora otro pasa su dilanti i probechá di e oportunidat.
Segun Stanley, ‘Kombersá ku Kuné’ tambe ke ilustrá un dinámiko simbóliko, unda e muhé ta representá bida real, unda hopi biaha nos por laga un oportunidat bai, paso nos no ke tumá un kurashi. ‘Kombersá ku Kuné’ a keda komponé pa Stanley, di meks pa produktor Zúrich Musiq, i e clip a keda dirigí pa Cineterra.
‘Like’ su Facebook.com/StanleyAcoustic pa keda na altura di tur demas presentashon durante e temporada di Karnaval. Pa presentashon durante e periodo di karnaval, mail steezmusic@gmail.com òf chek www.stanleyclementina.com Por mira e video di ‘Kombersá ku Kuné’ riba YouTube na e siguiente link: https://www.youtube.com/watch?v=T_oDgzdkFMk&feature=youtu.be