WILLEMSTAD.- Stanley Clementina, e talentoso kompositor i kantante kurasoleño, a kolaborá ku kantante Dayo StreaNobo pa su di kuater single ‘T’asina ta Biba’ fo’i su EP nobo. E kantika ta mustra nos bunita isla dor di wowonan di un bon Yu di Kòrsou. Stanley a aserka Dayo, e popular vokalista di reggae konosí pa su kansionnan positivo, pa kolaborá riba e interpretashon inspirativo akí. ‘T'asina ta Biba' ta otro melodioso kolaborashon Afrobeat ku Stanley a ko-produsí ku e talentoso MB Ghettoflow. Sinta den studio di e produktor dominikano na Ulanda, Stanley i Dayo a komponé e mensahe akí pa enkurashá nos komunidat pa keda positivo apesar di tur sirkunstansia di bida. Segun Stanley, tin tantu positivismo riba nos isla ku mester keda eksponé, i ora un persona ta eksperensia difikultat pa adaptá na e vibrashonnan positivo di nos isla, e kantika akí ta un guia pa alegrá su dia. Banda di e impreshonante naturalesa i playanan ku lo figura den e video, e unidat i amor di nos pueblo ta para sentral, algu ku Stanley ta spera lo atraé mas turista pa bishitá Kòrsou. Durante un bishitá kòrtiku na yüni último, Stanley a hasí vários presentashon i a probechá pa graba e clip di 'T'asina ta Biba' ku Dayo. E clip a keda dirigí pa Gilbert Silva da Costa i a keda graba na diferente lokalidat na riba nos isla. Pa mas informashon di Stanley su músika, ‘like’ su página di Instagram òf sigui riba Facebook.com/StanleyAcoustic. Pa presentashon, por fabor mandá un mail na steezmusic@gmail.com of chèk www.stanleyclementina.com. Bo por chèk e video di “T’asina ta Biba” riba YouTube: https://www.youtube.com/watch?v=slD0oSj58A8&feature=youtu.be