WILLEMSTAD.- Ayera tardi na final dje rueda di prensa di Fundashon JAG nan a anunsiá kua instansia ta e ‘Pilar di Karnaval 2020’ i tambe e ‘Baluarte di Karnaval 2020. Stanley Ignacio, miembro di direktiva i konsehero di Fundashon JAG a keda sorprendé ayera ku e anunsio ku e ta e baluarte di Karnaval 2020. E sobra miembronan di direktiva di JAG a tene e anunsio aki skondí i na momentu di e anunsio a sorprendé Stanley ku esaki. Stanley Ignacio no ta un deskonosí pa loke ta trata selebrashon di Karnaval. Den pasado e tabata presidente di AGKK, Asosashon di Gruponan di Karnaval di Kòrsou i tambe e tabata e kordinadó pa loke ta trata ‘Marcha riba Kabai’, esaki sin konta su aporte ku el a duna komo fotógrafo kubriendo aktividatnan di Karnaval pa korant EXTRA. Den su diskurso Stanley a hasi menshon dje echo ku e tin sigur 40 aña ta dunando su aporte na selebrashon di Karnaval di Kòrsou. Pa Karnaval 2020 e honor di ‘Pilar di Karnaval 2020’ a toka na Ofisina di Turismo. E aporte di Ofisina di Turismo durante último añanan tabata grandi, no solamente e promoshon internashonal di Karnaval di Kòrsou pero tambe komo sosten finansiero na e organisashonnan enkargá ku Karnaval. Sr. Ritzel Godfried di Ofisina di Turismo ku tabata invitado di Fundashon JAG a keda sorprendé ku e anunsio i na nòmber di Ofisina di Turismo a gradisí pa esaki.