WILLEMSTAD.- Ayera tardi Fundashon JAG a tene un rueda di prensa pa anunsiá tur e detayenan final pa loke ta trata Karnaval 2020.
Na inisio dje rueda di prensa Fundashon JAG a laga, sr. Stanley Ignacio, konsehero di Fundashon JAG duna su reakshon relashoná ku e informashon ku tabatin riba retnan sosial i ku a resultá riba un sin fin di komentario riba kaya.
Stanley a indiká ku el a risibí un sorpresa ora el a habri korant mainta. ‘Manera ma tuma nota dje informashon ma kuminsá un investigashon pa buska pa sa kiko ta e motibu. Tantu Juni i Djodjo ta mané mi yunan. Ma aserká Djodjo i a tende su komentario. Promé ku esaki Djodjo a bisa mi ku e kier a papia, pero dor ku mi tabata malu e no kier a molestiá mi. Ma haña informashon di tur dos banda. Mi por a konkluí ku ta un simpel mal komprondementu riba e dia di ‘Rei di Kaya’. E organisadónan a manda un invitashon i a indiká ku no por permití pa tur embahadornan tei. Fundashon JAG a pidi pa Reina di Bándabou tambe por asistí i e organisashon a bai di akuerdo’, asina Stanley a kuminsá splika.
Mas aleu Stanley a bisa ku a kompartí e informashon dje organisadó den e grupo di ‘app’ di e embahadornan. A surgi algun pregunta i e kordinando di transpòrt pa e embahadornan a kontestá esaki, loke a pone ku esun ku no por a asistí a sintié ofendí.
Stanley a indiká ku el a proponé pa e dos amigunan di infansia sinta huntu pero Djodjo a ninga i a bisa ku e no ta papia mas. Juni di su banda kier a papia pa por yega na trankilidat. Finalmente Stanley a bolbe indiká ku Juni i Djodjo ta 2 mucha ku a lanta fo’i chikí huntu.
Di su banda Juni Aniceta a indiká ku ‘Nos di Fundashon JAG ta lamentá e situashon aki inmensamente. E kos a keda komo si fuera ku Fundashon JAG ta maltratá e embahadornan. Nos por pleita den kas, pero ora nos sali ta un kara nos tin’.
Finalmente Juni a indiká ku ‘Ma surpasá e nivel, nos no ta bai kontestá. A keda komprobá ku e ‘voice’ no tin nada di aber ku Fundashon JAG. Mi ta pordoná e persona aki. Fundashon JAG ta sigui traha ku esnan ku ta kere den Fundashon JAG’.