Stanley Quirindongo

Na memoria di:

Stanley Quirindongo

*19-12-1946 - †29-9-2025

Dia 29 di sèptèmber 2026 Stanley Quirindongo a hasi 1 aña ku físikamente e no ta huntu ku nos mas, pero su presensia ta keda bibu den nos memoria. Stanley su filosofia di bida i su fortalesa ta sigui komo inspirashon pa nos. Stanley a dediká un gran parti di su bida na e lucha pa hustisia sosial pa un i tur, tantu lokal komo internashonal. Stanley tabata un independentista, aktivista i edukadó pa mas ku sinkuenta aña.

Stanley a partisipá na diferente manifestashon, entre otro:

• Manifestashon kontra invashon di Merka na Irak

• Manifestashon kontra Slotverklaring

• Manifestashon kontra seramentu di nos playanan

• Manifestashon kontra trahamentu'i kas riba tereno histórico i sagrado riba Ser'i Neger na Fontein

• Wèlganan pa lucha pa derecho di trahadó

• Trabou di eduká i konsientisá; tur esaki di un forma boluntario for di añanan setenta.

El a yuda lanta i partisipá den diferente organisashon manera:

- MPLA, Movementu Pro Liberashon di Antia, ku tabata publiká e revista Liberashon

- Movementu Sakadó ku tabata analisá i publiká susesonan riba tereno polítiko,  laboral/ sosial di un manera krítiko.

- Plataforma Bèrdat Históriko, ku e meta prinsipal manera e nòmber ta bisa: trese nos historia real  dilanti. Plataforma Bèrdat Históriko organisá diferente eksposishon riba tereno di nos kultura;  nos idioma Papiamentu, Plantamentu.

- Ruta Tula, tambe un proyekto di Plataforma Bèrdat Históriko ku a kuminsá na 1999 i sigui te ku 2019,   bintiun aña konsekutivo ku hopi éksito.

Stanley tabata tambe te final di su bida, boluntario na Bos di Hubentut, pasobra su kurason tabata bati pa nos hubentut, pa nan ta bon kuidá. Su trabou na Bos di Hubentut tabata enserá tambe; yuda kombatí violensia doméstiko.Stanley a fungi te na final di su bida komo sekretario di Fundashon Museo Tula, ku p'é tabata un trabou ku el a hasi ku dedikashon, pasobra meta di Museo Tula ta: traspasá un parti importante di nos historia, ku henter pueblo mester ta konsiente di dje, pasobra bo mester konosé bo pasado pa komprondé bo presente i traha riba bo futuro. I manera Marcus Garvey a bisa:“Un pueblo sin konosementu di su historia, orígen i kultura, ta manera un palu sinrais”.

Stanley su último palabranan tabata tambe:  “E lucha ta sigui!”.

Stanley a stima su famia i anke e tabata hopi okupá den diferente organisashon, el a sa di saka tempu

pa su famia. Stanley, Stan, Papa, Tio, Padú, manera a yam'é, ta keda pa semper den nos kurason.

Kasá: Odette Quirindongo-Wanga

Yu: Shanto Quirindongo

2 di òktober 2026