I donashon di instansianan internashonal

WILLEMSTAD.- Stichting Epilepsie Curaçao ta trahando riba trayektonan pa asina por bin na remarke pa haña tantu supsidio di Gobièrnu komo donashon for di instansianan internashonal. E fundashon ta operá aktualmente a base di donashon risibí serka instansianan lokal. Presidente di e fundashon, Bruna Kwidama, ta bisa ku mas medio finansiero lo yuda e fundashon organisá mas aktividat.

Stichting Epilepsie Curaçao tin komo meta prinsipal pa traha riba konsientisashon di e malesa di epilepsia. Ta tene charla i tambe a kuminsá ku un gira na skolnan pa konsientisá maestronan di skol di e diferente tipo i formanan di epilepsia i atakenan epiléptiko. Tambe ta bai kuminsá ku seshonnan di informashon pa alumnonan pa yuda krea konsientisashon i komprenshon bou di muchanan pa asina evitá ku ta ‘bully’ un alumno ku ta sufri di epilepsia.

Banda di esaki, e fundashon tin sierto deseonan pa futuro. Por ehèmpel, ke tin e posibilidat pa yuda muchanan yega na artefaktonan ku ta yuda protehá nan. Kosnan ku por bisti pa protehá nan kabes den kaso ku nan haña un atake i kai. Otro ehèmpel ta vigilansia na kas pa hendenan ku ta haña atake epiléptiko frekuente den nan soño.

“Esaki ta kosnan ku nos ke yega na dje kaminda e fundashon por brinda un sosten na hendenan ku epilepsia. Ku e ayudo akí nan por manehá nan bida mas mihó.” Naturalmente tambe tin e nesesidat pa tene mas charla na entre otro na skolnan manera ya menshoná, pero tambe pa doñonan di trabou.

Tin trahadó ku tin miedu di bisa nan doño di trabou ku nan tin epilepsia pa nan no pèrdè nan trabou. Un otro deseo ku e fundashon tin ta pa renobá su wèpsait. Kwidama ta bisa ku ke hasi e wèpsait mas interaktivo i moderno kaminda por pone mas informashon i hendenan por duna opinion.

Aktualmente Stichting Epilepsie Curaçao ta hasi mas uso di su página di Facebook pa e parti interaktivo aki. Finalmente t’asina ku e fundashon no tin un edifisio. “Hopi hende ta puntra si tin un ofisina kaminda nan por pasa, pero te ainda nos no tin.”

Mirando ku ta trata di un tópiko delikado i ku ainda tin un tiki tabú rondó di dje, tin hende ku ke papia personal ku miembronan di Stichting Epilepsie Curaçao, Kwidama ta bisa. Tambe na un ofisina por tin material di informashon ku un persona por tuma nota di dje. Den futuro asta por pensa ku Stichting Epilepsie Curaçao tin un propio sikólogo den kas ku esnan ku akudí por papia kuné.

“Tur esakinan ta plannan ku tin pa futuro.” Den e luna’kí Stichting Epilepsie Curaçao lo tin su próksimo charla i tambe pa e aña’kí mes ta bai lansa su kampaña “Ban Kita e Tabú” kaminda lo tene un diskushon den pènel i ku lo ta habrí pa tur hende partisipá.