WILLEMSTAD.- Ayera mainta ‘Stichting Leerorkest Curaçao’ a duna inisio na su promé siklo di formashon musikal na momentu ku nan a bishitá Kolegio Maria Auxiliadora na Sta. Maria.
Pa e okashon aki a organisá loke nan a yama un ‘speeddate’, oportunidat pa e hóbennan por sera konosí ku diferente instrumènt manera dwarsfluit, klarinèt, trompèt, trombon, perkushon i fio.
E hóbennan durante henter aña eskolar nan lo risibí formashon musikal riba nan instrumènt, na skol, durante di ora di skol. Nan lo ser prepará pa presentá durante di un konsierto grandi riba ‘Dia di Himno i Bandera’, 2 di yüli 2018.
Tin mas skol na Kòrsou ku ta interesá pa kuminsá ku un ‘leerorkest’. E fundashon lokal, ‘Stichting Leerorkest Curaçao’ ke hasi esaki posibel i ta risibí ayudo i ekspertisio for di ‘Stichting Leerorkest di Amsterdam’ ku a pèrkurá tambe pa e instrumèntnan pa kuminsá siklo di formashon musikal.
Introdukshon di ‘Leerorkest’ na Kòrsou ta e oportunidat úniko pa duna hóbennan formashon musikal. For di pasado muzik tin un lugá importante na Kòrsou, pero na skol debí na falta di fondo no por a duna muzik e atenshon nesesario i no tin un struktura kaminda e hóbennan por forma parti di dje. ‘Leerorkest’ tei pèrkurá pa e tradishon musikal kontinuá na Kòrsou i ta duna kada mucha un instrumento musikal den man.
Riba foto nos por apresiá momentu ku a duna e hóbennan di skol di fundeshi, Maria Auxiliadora e oportunidat pa sera konosí ku un instrumènt. Potrètnan pa kortesia di Alice Ferguson.