WILLEMSTAD.- Groot Kwartier Stars a kita e promé wega for dje seri di dos partido kontra di Sta. Rosa Indians i a hasi esaki ku picheo kombiná di Daal i Kleinmoedig kendenan a basha 10 ponche riba e indjannan. Kwartier a kue un viktoria ku sigur ta importante pa e ekipo por gana poko posishon. Nan a hasi esei ku un viktoria di 7-6 den un wega ku a kana hopi pareu.

E streanan di Kwartier ta bai ariba 3-0 den promé inning, pero a mira kon esnan di Pariba a yega serka den bòm dje entrada ku dos kareda. Kwartier ta kue dos mas den kabes dje di dos inning, pero Sta. Rosa ta rally pa 3 den di dos pa pone e skor pareu: 5-5.

Dos kareda ku Kwartier a skor den di kuater a resultá di ta sufisiente pa nan a bin gana e partido ku a bai solamente shete inning.

Pa Groot Kwartier Stars 7 kareda, 7 hit i 6 eror. Jayson Kleinmoedig a tira 5 inning di relevo ku 3H, 7SO i 3BB pa gana e partido.  Dietrich de Windt a bati di 3-2 ku 2 RBI.

Pa Sta. Rosa Indians 6-11-1. Rowendley Windster a lansa 4.2 inning di relevo, permitiendo 4H, 2 kareda, 4SO i 1 BB i a karga ku e derota.  Ayrton Gijsbertha a liga di 2-2, Riordan Windster i Swindley Linti di 3-2 kada un.