WILLEMSTAD.- Djasabra, 22 di desèmber entre 4 or i 12 or, e di dos edishon di Street Culture Festival 'Kaya Kaya’ ta start sali. E ta un festival ku ta uni partisipantenan na un sitio den kurason di Ser’í Otrobanda na un manera sorpresivo.
For di Keizershof bai Van Lennepstraat, i despues via Venusstraat yega ‘mirador’ bou di brùg kaminda bo tin bista fantástiko riba bahia di Santa Ana.
Huntu ku e abitantenan di e bario a traha duru e simannan ku ta tras di lomba pa konstruí un bario pa keda eksistí. E meta ta pa laga e bario atras den un situashon mihó ku nos a bin hañ’é: ‘Leave it Better Behind’.
Abo komo bishitante por konta riba un festival tur afó pa selebrá e desaroyo aki ku diferente kultura di kayanan di Kòrsou. Bo ta haña presentá obranan, live music, pop-up restorants i otro vendor stands ku por ehèmpel kos dushi i bibida.
‘Meta di e festival ta pa trese diferente hendenan huntu i pa duna un bario un impulso positivo. E trabounan ta tuma lugá den estrecho koperashon ku Fundashon Ser’í Otrobanda’ palabranan di Kurt Schoop. ‘Un toke positivo ta ku Kaya Kaya a haña diferente spònser ku nos tin e posibilidat pa desaroyá e bario di un sistema mas duradero.’
E personanan ku a krea Kaya Kaya ta Kurt Schoop, Raygen Zuiverloon i Clayton Lasten. E promé Kaya Kaya a tuma lugá ougùstùs ku tabata un éksito rotundo. E éksito a animá e trio pa kuminsá prepará mes ora pa e di dos Kaya Kaya. Un limpiesa grandi mester a tuma lugá i planta mata pa un toke bèrdè. Entre otro Aviantia Damberg, Marvi Johanna i Franco Zapata ta sòru pa diferente tipo di obranan di man i pinturanan na muraya (Murals). E desaroyo aki nos ta bai selebrá 22 di desèmber ku e Street Culture festival, Kaya Kaya.
Schoop: ‘E idea tras die Street Culture festival ta ban gosa, baila, kome, bebe i ban topa. Ku e programa di e día ei, no tin duda ku tur hende lo gosa. Tin algu pa tur hende.’ Tin podia manera “Boi’ Palu”, “Plenchi”, “Heights” i “Plasa” loke ta e presentashonnan ku bo por skohe loke bo gusta. Bo por skucha jazz legends Ronchi, Betrian, Lonte, Saturnino, Rudy & Hershel. New Roots Rising Ft. Junior Tecla & Russel Soliana (Issoco), Ron Le Bass Ensemble Ft o.a. Andrew Christopher, Young & Upcoming Talent Stage by Silver Wolves, Kaylee de Haas, Happy Peanuts, K’Ribe, Hype i Aisha Lucas. Dies diferente DJ’s, p.e. DJ Beetz, Mr Cash, Jay Stax. Pit Smoker, Bali, Koki Riba Bloki i un Backyard Pop Up restorant di Furdy’s ta ofresé bo dushi kuminda i tur sorto di snacks. Abitantenan ta pone nan kas disponibel pa artistanan, manera UFO & Carlos Blaaker por us’é komo galeria di arte. Abitantenan di Otrobanda tambe ta ofresé bo tur sorto di kos di pasa boka manera ayaka, keshi yená, sùlt, empaná, pasa palu box, vegan, grill i e sòpi di Kaya Kaya.
Zuiverloon: ‘Loke ta importante ta e echo ku e abitantenan di e bario ta 100% enbolbí. E embolbimentu ei a duna komo resultado ku e promé edishon di Kaya Kaya a trese un kambio permanente. E ‘community buidling’ ku nos tabatin den mente a logra. Nos ta eksperensi’é den práktika.’ Despues di Kaya Kaya, regularmente tin fiesta, BBQ, i tambe hendenan i turista ku ke wak e bario. Nos ta bai mas leu. Tin diferente grupo ku a demonstrá interes den e bario despues di Kaya Kaya. A filma un videoclip Brasilero den e bario i un Kas di Moda internashonal a hasi un fotoshoot aki den e bario. ‘Asina nos ta mira spin-offs bunita i importante.’ Zuiverloon ta bisa.
‘Nos ke revelá e potensial di Otrobanda Kaya pa Kaya i sigui desaroy’é. Ku e festival nos meta ta pa duna e bario un boost, saka presiosidatnan i konektá hendenan ku otro. Kaminda e festival ta bai tuma lugá ta un parti di Otrobanda ku tin hopi kos i partinan presioso ku ta skondí. P’esei nos ta invitá bosonan tur pa bin eksperensia e sorpresa di bo bida.’ palabranan di Lasten.
E festival ta grátis i ta pa chikitu i grandi. Lasten: ‘Un konseho: bisti sapatu kómodo. Nos ta warda boso ku kurason habrí.’