WILLEMSTAD.- Djadumingu awor pa 12.30 di mèrdia EXTRA lo kuminsá ku transmishon di Inskripshon pa Festival di Tumba 2019.
Aña pasá tabata e promé aña ku EXTRA a produsí i transmití e inskripshon di Festival di Tumba via di kanal 75 i 76 HD di TDS i a hasi uso di su plataforma digital: wèpsait, facebook i kanal di YouTube.
E reakshon durante i despues dje transmishon di aña pasá tabata tremendo i sigur tabata un insentivo pa e aña aki bolbe presentá e inskripshon di Festival di Tumba, e evento musikal mas grandi di Kòrsou.
Pe aña aki ya preparashon a tuma lugá pa djadumingu awor ofresé un tremendo transmishon karga ku informashon i ambiente.
E tim di aña pasá formá pa e tres biaha Rei di Tumba, Rubertico ‘Benoni’ Balentien i Luis Curiel lo keda reforsá e aña aki ku Sue-Ellen Cijntje, kende no ta un deskonosí dilanti di kámara. E aktual kolaboradó di Kas di Kultura ta djòin e tim di EXTRA pa dje forma ei nos brinda e ‘Extravidentenan’ un transmishon kaminda tur detaye lo keda presentá.
Prepará bu pa bo sinta disfrutá di un transmishon yen di ambiente i informashon, oportunidat pa sera konosí djaserka ku nos artistanan lokal i tende fo’i nan mes boka kiko nan tei presentá den e di 49 edishon di Festival di Tumba.
Djòin nos for di 12.30 di mèrdia i sigui ku nos te 8 or na momentu ku nos yega na final dje transmishon. Sigui e transmishon na kas via di TDS òf unda ku bo ta hasiendo uso di un dje plataformanan digital ku EXTRA ta disponé di dje.