WILLEMSTAD.- Sugar by Design 2018 ta un evento dushi den tur sentido; e ambiente lo ta dushi den èrko i tambe tur loke keda eksponé tin suku aden, ounke ku lo tin tambe produktonan pesnan ku no ta usa suku, trahá ku suku natural òf sin suku. Caribbean Bakery & Restaurant Supplies tabata sitio ayera tardi unda ku e konferensia di prensa a tuma lugá, durante ku a duna tur informashon rondó di e evento úniko aki.

Promé piso
Sra. Margie Rodriguez, kordinadó di e evento, a splika ku e evento lo tuma lugá den henter e edifisio di PWFC na Schottegatweg i a duna splikashon di kiko tur lo tin riba e promé piso. Riba e piso aki lo tin entre otro vários stènt bou di dak i tambe den sala, unda públiko lo por atmirá, purba i mas ku klaro kumpra e diferente produktonan. Banda di esei, lo tin tambe vários idea pa dekorashon di fiesta, diferente modèl di bolo, produktonan salú, regalonan pa duna na fiesta i fin di aña i mas ku klaro benta di bolo i nos kosnan dushi. Den e sala mes lo krea un ‘patio’ kaminda ku bo lo por sinta i disfrutá di e ambiente.
Un novedat ku e evento aki tin, ta ku bo mes por harma bo buki di reseta pa traha bolo i kosnan dushi;  abo ta skohe e reseta ku bo ke i e momentu ei ta harma bo buki, kuminsando na fl. 10,-.

Di dos piso
E di dos piso tambe lo ta kargá. Sra. Richenna Mathilda, miembro di organisashon di Sugar by Design, a konta mas aleu ku ariba tambe lo tin mas stènt, bon kuné, sekshon kaminda nos muchanan por dòrna bolo i tambe e área di demostrashon i e diferente kursonan.

Demostrashon i kurso
Sugar by Design ta konta ku presensia di Dalila Cabrita, un instruktor internashonal kende a keda aserká pa kompartí su konosementu ku nos hendenan. E kursonan tin durashon di 4 ora. Esaki ta inkluí tur material, bo mes ta traha bo piesa kompleto i naturalmente bo ta bai kas kuné. Mester remarká ku e téknikanan ku lo duna ta nobo pa Kòrsou!
Tambe lo tin diferente demostrashonnan ku durashon di 1 ora kada un.
Representante di Caribbean Bakery & Restaurant Supplies, sra. Ana da Silva, a ekspresá su satisfakshon di ta un di e partnernan di e evento aki, den kua natural nan tambe lo eksponé tur nan produktonan ku nan tin i spesialmente pa e temporada di fin di aña i na preisnan speshal.

Entrada i orario
Sugar by Design 2018 ta tuma lugá riba djabièrnè 16 di novèmber di 6 or di atardi pa 10 or di anochi, djasabra 17 di novèmber di 3 or di atardi pa 10 or di anochi i riba djadumingu 18 di novèmber di 10 or di mainta pa 8 or di anochi.
Pa esnan ku ta den rolstoel òf tin kualke desabilidat, lo no ta problema pa bai riba e di dos piso ya komo ku tin left den e edifisio.

Informashon
Pa kualke informashon i mas ku klaro keda na altura di tur loke ta pasando rondó di Sugar by Design, por chèk a página di Facebook, www.facebook.com/Sugarbydesign2018.  Tambe por yama/WhatsApp na +59996644000.