WILLEMSTAD.- ‘DEN E BEMBE’ a konfirmá ku tin un grupo grandi di supladónan Venezolano ku lo mester a manda informá bandanan lokal ku e aña aki nan lo kobra 250 dòler pa kada tumba ku nan kompaña den Festival di Tumba.
E informashon aki lo mester a kai manera un bòm serka bandanan grandi ku mesora a akshoná i a drenta deliberashon ku e supladónan ku nan tin kustumber di traha kuné. Den promé instante tur hende tabata uni i tabata para riba e montante di 250 dòler, pero despues poko poko algun a kuminsá baha preis.
Segun nos por a komprondé ayera nochi ku ainda tin algun supladó ku ta para na 150 dòler i tin un grupo ku a baha bai e preis normal di 100 dòler.
E motibu prinsipal di e subida di e preis ta sinta den e echo ku e supladó nan a reklamá ku e areglistanan no ta hasi wega ku nan areglo, nan ta karga e areglo ku dje tantu momentu ku e brass tin ku supla ku praktikamente bo por bisa ku e no ta sobra niun lugá ‘blanku’ riba e pentagrama. Ta ‘pretu pretu’ e kos ei ta yena!. Anto esaki ta reflehá den un preshon di trabou enorme pa e lepnan i kansansio ku esaki ta trese.
Den kombersashon ku un lider di un banda ela indiká na ‘DEN E BEMBE’ ku aworakí kaba e ta pagando mas o ménos 13.500 florin na gastu pa e por dispone di un sekshon di brass pa kompaña 5 tumba. Si e preis subi, e ta bira imposibel pa un banda hasi uso di un sekshon di brass kompletu, paso no ta sobra sèn pa e otro músikonan ku ta toka den e banda.
Bandanan ta paga pasashi, paga lugá di keda, outo pa kore, paga ‘perdiem’ (sèn pa kuminda) i aserka e montante di 100 dòler pa kada tumba ku ta keda toka. Ta hopi gastu bandanan tin den Festival di Tumba i e impreshon ku e bandanan ta gana masha plaka ku Festival di Tumba no ta bèrdat. Esaki sigur ora bo wak e ‘budget’ ku e bandanan tin pa loke ta trata partisipashon na Festival di Tumba.
Finalmente ‘DEN E BEMBE’ a bin komprondé ku tin bandanan ku ta logrando pa konvens’é e supladónan ku nan tin kustumber di traha kuné pa bai bek e preis normal, pero tin algun dje supladónan di ‘primera’ ku ta para riba nan preis.