LA HAVANA, CUBA (AFP).- E supmarino ruso di propulsor nuklear “Kazan” a yega Cuba komo parti di un grupo naval ku ta realisá un estadia di sinku dia na e isla, na momento ku tin tenshon kresiente entre Merka i Rusia. Algun minüt despues di 10’or di mainta “Kazan” a drenta bahia di La Habana mustrando riba superfisie di laman un bandera kubano. Dos ora promé tabata e barku “Pashin”, ku tabata vigilá e flota, siguí pa e barku di salbamentu “Nikolai Chiker” i e fragata “Almirant Gorshkov”.
E Ministerio di Forsanan Armá Revolushonario (Minfar) a indiká siman pasá ku e nabegashonnan no ta karga armanan nuklear i no ta representá un “menasa pa e region”. Promé di drenta e haf di La Habana, “un grupo táktiko di barkunan ruso, integrá pa e fragata i e supmarino a kompletá un ehersisio riba uso di armanan di misil di hopi presishon”, segun e Ministerio di Defensa ruso den un komunikado.
Personanan ku tabata kana riba e konosido Malecon habanero a keda asombrá di mira e supmarino riba un distansia asina kòrtiku.
Sup sekretario di prensa di Pentágono, Sabrina Singh, a bisa na prensa ku Washington a bin ta sigui e moveshonnan dje supmarino. “No ta un sorpresa” pasobra rusonan na otro okashonnan tambe a realisá e tipo di eskalanan na e isla karibense”, el a agregá. E funshonario ta mira ku e bishitanan aki “no ta suponé di ta un menasa pa Merka”, di kua su kostanan dje estado di Florida ta na 160 kilometer for di La Habana.