JOHANNESBURG, AP.- Cyril Ramaphosa a wòrdu skohé komo presidente nobo di Suráfrika pa legisladornan di e partido ofisialista djaweps despues di e renunsia di Jacob Zuma, kende su diferente skandalnan a senk Kongreso Nashonal Afrikano den su momentu di mas pió desde final di e apartheid.
Ramaphosa tabata e úniko kandidato postulá pa parlamento despues ku dos partido opositor a disidí pa no partisipá. E partidonan opositor a pidi pa disolvé Asamblea Nashonal.
E presidente di Korte Supremo Mogoeng Mogoeng a presidí e elekshon parlamentario i a felisitá Ramaphosa, kende tabata e number dos di Zuma.
Zuma a renunsiá despues di un serie di skandal ku a daña e reputashon di CNA, kende a pidié pa renunsiá òf enfrentá un moshon di sensura den Parlamento. Zuma ta ninga di a hasi algu inapropiá.
Ramaphosa ta e kinto presidente ku Suráfrika tin desde final di e apartheid den 1994. Awe tardi e lo duna un diskurso ku a wòrdu kanselá miéntras ku e negosiashonnan privá pa konvensé Zuma pa renunsiá tabata ekstendiendo.
Mayoria surafrikano a alegrá ku e final di Zuma su gobièrnu a yega, i ku e moneda nashonal, rand, a subi kontra dòler riba merkado internashonal.
