WILLEMSTAD.- Kòrsou ayera nochi a bira riku na 14 komposishon ku a ekspresá e grandesa di Kòrsou den e sentido mas amplio di palabra.
Kompositornan lokal a bria ku nan komposishon i sinseramente nos ta spera ku medionan di komunikashon lo duna atenshon na e piesanan nobo aki ku sigur ta yuda konsientisá i lanta e sentido di patriotismo.

FINALISTANAN
Di e 14 finalistanan a skohe 8 finalista, esaki debí na empate. E 8 finalistanan: Ced Ride, Naomi Silvanie, Harlianne Silvanie, Emsley Janga i Shannon Martha, Christeline Corasol, Surelma ‘Lady Su’ Miguel, Edson Nahr i Zjainery Nicaela.

HOMENAHE
Instituto pa Formashon Musikal huntu ku Gobièrnu di Kòrsou a homenahiá e baluarte pa ‘Un Kanto pa Kòrsou 2018’, Melania van der Veen. Fuera ku Melania a interpretá dos kansion a entreg’é tambe un plakat di rekonosementu.

PREMIASHON
Despues ku e 8 finalistanan a duna nan presentashon e hurado a retirá i pa finalmente e presidente di hurado, Sr. Gilbert ‘Gibi’ Doran hasi entrega di e resultado.
Mihó areglo a bai pa Gregory Colina ku e areglo pa ‘Kòrsou mi Dushi’, kansion komponé pa Darwin Gregg i interpretá pa Surelma ‘Lady Su’ Miguel.
Christeline Corasol a resultá e di tres finalista interpretando e kansion ‘Tin un lus ta bria’. Komo di dos finalista a keda premia Naomi Silvanie ku a kanta ‘Kurason di nos Pais’. E promé finalista a resultá Harlianne Silvanie ku a interpretá e kansion ‘Ban pa nos yega’ i Surelma ‘Lady Su’ Miguel a gana e festival interpretando e komposishon di Darwin Gregg titulá: ‘Kòrsou mi dushi’ i areglá pa Gregory Colina.
Pabien na ‘Lady Su’ i tur otro finalistanan ku nan logro.