AMSTERDAM.- Miquel Nelom, Mitchell Donald, Diego Biseswar, Ryan Donk i Kelvin Leerdam awor dirèkt por hunga pa Sürnam,di akuerdo ku un desishon di FIFA. E federashon mundial na un promé instante a rechasá e petishon surinameño pa nan por usa e hungadónan hulandes-surinameño, pero awor nan a revoká e desishon.

FIFA anteriormente a adaptá reglanan relashoná ku kambio di nashonalidat di futbolistanan, pero Nelom (Willem II), Donald (Erzurum BB), Biseswar (Apollon Limasol), Donk (Galatasaray) i Leerdam (Seattle Sounders) a keda’fó. Esei tabatin di aber ku e echo ku e sinku futbolistanan ei ku 22 aña a hunga pa Hulanda den un  buèlta final U21. Pero e federashon surinameño a reklamá e desishon i awor nan a haña rason.

Ku introdukshon di e pasport di deporte, mas futbolista hulandes-surinameño e último tempu a skohe pa hasi e kambio. Nigel Hasselbaink (Sakhnin), Dion Malone (NAC Breda), Ryan Koolwijk (Almere City FC), Roland Alberg (Hyderabad), Myenty Abena (Slovan Bratislava), Ishan Kort (Almere City FC) i Damil Dankerlui (FC Groningen) ya a pone nan mes disponibel.

Sürnam ta den grupo ku Canada, Bermuda, Caiman Islands i Aruba den grupo di klasifikashon riba kaminda pa yega Kopa Mundial 2012.