WILLEMSTAD.- Den wikènt ku ta tras di lomba a tuma lugá e presentashon dje obra ‘Suprise Party pa Loloi’ den Teatro Luna Blou. Tantu djasabra komo djadumingu e públiko a duna bon oido i a presentá pa disfrutá dje obra humorístiko skibi pa Roland ‘Pachi’ Damon.
‘DEN E BEMBE’ a kombersá ku Pachi Damon kende a indiká ku aworakí ta te dia 30 di novèmber i 1 di desèmber tin e siguiente presentashon. ‘Lo ta e último dos presentashonnan. Nos a bisa ban pa un ñapa pa fin di aña i a prepará pa presentá 4 fecha, despues nos ta kla’, asina Pachi a splika.
E elenko ta pendiente pa biaha pa Aruba den e di dos siman di desèmber pa presentá e obra den Cas di Cultura na Aruba. Manera ta kustumber nan lo bai Ulanda tambe, pero esei lo sosodé otro aña den luna di aprel òf mei.
Pa e próksimo 2 i último presentashonnan na Kòrsou e karchinan lo ta riba merkado un djis, Pachi a duna e konseho pa buska bo karchi trempan pa bo no tin nodi di warda te otro aña pa wak e ‘Surprise party pa Loloi’.