MERKA.- ‘Hakuna Matata’ ta nifiká ‘No tin problema’ na Swahili, pero su definishon nada tin di aber ku e realidat. E frase mítiko di ‘Lion King’ lo por kosta Disney un demanda di apropiashon kultural, despues ku un aktivista a kuminsá ku un kolekshon di firma kontra dje kompania.
Segun Fox News, Shelton Mpala, un aktivista di Zimbabwe, a lansa un petishon riba Change.org pidiendo Disney pa renunsia riba e marka registrá dje frase, akusando e kompania di apropiashon kultural, kalifikando e registro di ‘Hakuna Matata’ komo kolonialismo i robo.
‘Hakuna Matata ta wòrdu utilisá den mayoria pais kaminda ta papia Swahili, manera Tanzania, Kenia, Uganda, Rwanda, Burundi, Mozambique i e Repúblika Demokrátiko di Congo’, asina e petishon ta afirmá. ‘No por permití Disney registrá algu ku e no a inventá’. Na e momentunan aki e petishon a surpasá 51 mil firma.
E frase ‘Hakuna Matata’ a bira popular despues ku el a aparesé den e klásiko di 1994, ‘The Lion King’. Algu despues, Disney a registrá e ‘slogan’, loke a keda aprobá na 2003. Sinembargo e problemanan di apropiashon kultural a surgi despues ku a anunsiá e di dos edishon dje pelíkula sinematográfiko.
‘Hopi di esnan ku ta papia Swahili a keda sorprendé, nan no tabatin e idea ku esaki tabata pasando’, asina Mpala a bisa BBC. ‘Ma krese na Zimbabwe, semper ma komprondé ku e idioma di un kultura ta su rikesa’. Ounke Mpala no ta papia Swahili, el a splika ku esaki ta djis un ehèmpel ku Africa ta wòrdu eksplotá.
E vershon nobo dje pelíkula a lansa su ‘trailer’ luna pasa ta keda dirigí pa Jon Favreau i lo ta den salanan di sine dia 19 di yüli 2019.