WILLEMSTAD.- Awe minister Steven Martina a keda pa duna informashon riba loke ta bai sosodé ku e pèrmitnan di e establesimentunan ku tin prohibishon pa laga bandanan lokal toka den nan negoshi. Manera ta konosí djasabra último e informashon a kuminsá sirkulá riba retnan sosial kaminda a indiká ku Polis lo mester a notifiká tur e doñonan di negoshinan den Pietermaai ku eksepshon di ‘Bar 27’ ku nan no por laga agrupashonnan musikal presentá den nan negoshi, esaki debí ku nan pèrmit no ta duna outorisashon pa esaki. Mesora kritiká a kuminsá dominá tur e reakshonnan ku tabatin riba retnan sosial. A hasi menshon ku tur hòfi i tambe sitionan di dibertishon ku a keda sera òf ninga pèrmit pa entre otro ‘muziek overlast’, molèster di músika. Komentarionan a mengua na momentu ku a bira konosí ku e negoshinan tin un ‘Koffiehuisvergunning’, pero no tin outorisashon pa muzik ku banda keda presentá. E área di Pietermaai a keda desaroyá ku diferente establesimentu di horeca i restorant kombiná ku komplehonan di apartamentu pa studiantenan ku ta bin pasa nan periodo di ‘stage’ na Kòrsou. Mei Mei di nan a keda ainda algun kas partikular i tin un kompleho di apartamentu kaminda yunan di Kòrsou ta biba. Resientemente a logra un insentivo mionario pa sigui desaroyá e área di Pietermaai loke ta hasi e área un turistikamente mira di gran balor. Den henter e área e negoshinan di horeca ta hunga un ròl importante. Den Pietermaai e situashon ta un masha pekuliar. Tin un negoshi ku no tin pèrmit ‘at all’, solamente un petishon di pèrmit, ku no a keda honra ainda, pero regularmente ta organisá karaoke. Tin un otro negoshi ku mester a aparesé den korte resientemente pa motibu di pone banda toka sin pèrmit den un hanchi, Fuikstraat, i a pèrdè e kaso aki, pero niun hende no a sali na defensa dje negoshi òf e músikonan ku a pèrdè un fuente di entrada si e negoshi por a sigui duna oportunidat pa bandanan presentá. I por último bo tin ‘Miles Jazz Cafe’ i ‘Mundo Bizarro’ ku a prohibí nan di laga bandanan lokal presentá, debí ku nan pèrmit no ta duna oportunidat pa esaki sosodé. Aserka mester hasi menshon di un restorant ku ta habri, pero ku ta usando dos pèrmit, di kua un a kaduká pa por ‘drai’ nan negoshi. E punto prinsipal den henter e situashon ta ku e reklamo di molèster di muzik ta bini di abitantenan ku ta biba den e área di Pietermaai kaminda tur e negoshinan aki ta situá. Un reportahe ayera nochi di TeleCuraçao a duna e impreshon ku tin algun hende ku no tin problema, pero ku tin algun ku si tin opheshon. Si Gobièrnu bai tuma un desishon sin tene na konsiderashon e reklamonan ku tin riba ‘muziek overlast’, e molèster di muzik, nan lo haña nan konfrontá ku algun otro negoshi di Horeca ku den pasado resien a risibí mesun notifikashon. Ora di otorgá un pèrmit kaminda por tin ‘molèster’ di kualke índole esaki mester keda publiká den korant pa esnan ku tin opheshon por entrega un ‘bezwaar’. E prosedura aki mester wòrdu hasí pa evitá ku Gobièrnu ta hañ’é ku kaso kontra di dje pa inkumplimentu. E prosedura aki ta deskribí tambe den ‘Vergunningslandsverordening’, loke ta pone ku lo mester hasié.

AMAK su desishon di akshona ta di aploudi, pero nos ta di opinion ku nan ta laga e ‘kayente’ dje situashon bai muri, paso pa awe kaba Gobiernu, den persona di Minister Martina, lo anunsia algun desishon ku nan a tuma pa ku e kaso di Pietermaai. Loke si ta importante ta pa e musikonan demostra nan desaprobashon pa e situashonnan aki, pero mesora mester rekonose tambe ku doñonan di diferente dje establesimentunan ku a keda afekta pa e desishon ta nan mes ta responsabel pa a pidi e permit nesesario i awor no por bin hunga e rol di ta viktima dje situashon. Por ultimo si hasi un eksepshon pa e area di Pietermaai, mester tuma na konsiderashon tambe tur e establesimentunan di Horeca ku resientemente of den pasado pa mesun motibu a keda perhudika i ninga un permit pa presentashon di banda den nan negoshi.