KRALENDIJK -- Den futuro serkano Boneiru ta bai pidi un prueba di bakunashon, esta un QR code, òf un prueba ku un hende a tèst negativo pa por drenta na sierto eventonan. “Nos ta hasi esaki pasobra pokopoko nos ke bolbe bèk na un bida normal sin ku nos ta kore riesgo grandi di kontagio”, gezaghebber Edison Rijna a bisa ayera tardi den un konferensia di prensa.

E plan ta pa Boneiru haña e mesun areglo ku tin na Hulanda. Esta ku personanan no bakuná por tèst grátis pa bai un evento. Awor aki Boneiru ta den deliberashon ku ministerio di VWS pa logra esaki.

Rijna a splika: “Den hóreka nos ta mira ku tin lugá kaminda hopi hende ta balia pafó. Esei ta un riesgo grandi pa tur esnan presente. Ku e qr code òf e tèst grátis pa hende no bakuná, nos por sòru pa tene e eventonan akí na un manera mas seif. Nos ta trahando duru pa pronto por introdusí e qr code òf prueba di resultado negativo di tèst pa por drenta na evento grandi.”

“Asina nos tin tur kos reglá ku ministerio di VWS nos ta informá komunidat. Entrante djaluna 25 di òktober lo tin mas kapasidat na e callcenter 0800 0900  pa pidi e qr code”, Rijna a bisa.