WILLEMSTAD.- Pa presidente di Fundashon Kultural Seú Kòrsou, sr. Lionel Jansen ta masha importante pa kada yu di Kòrsou ta konsiente kada biaha di nobo kiko e fiesta di Seú ta nifiká o ta para p’e.
“Nos ta den aña 2020 i atrobe nos a yega na nos tradishonal selebrashon di fiesta di Seú, ku ta nos fiesta di kosecha. Ta importante pa kada yu di Kòrsou ta konsiente kada biaha di nobo, kiko e fiesta ta nifiká o ta para p’e. Aki nos mester tene na kuenta ku nos historia, nos folklor, aspektonan sosial-ekonómiko i spiritual di nos pais. Nos tarea ta pa kada biaha di nobo, keda eduká i sigur konsientisá nos komunidat, spesialmente nos hubentut. Mester siña balorá nos músika, kanto, baile, trahe, artefaktonan krioyo i kustumbernan. Tur e komponentenan aki di nos kultura a pasa den sierto desaroyo, pasobra nos kultura ta bibu i dinámiko. Por bini ku desaroyonan kontemporáneo pero semper i ora tin ku mustra nos pueblo ku e fiesta aki ta un gradisimentu na Señor pa e kosecha. Esaki no mester bai pèrdí. Laga nos disfrutá di nos fiesta di Seú konsientemente”.