‘Ta ken ke hiba Tumba na su Tumba?’, un komedia humorístiko skibi pa Milangelo ‘Oko’ Dap, dirigí pa Ronald ‘Pachi’ Damon lo konta ku un elenko di artistanan manera nan mes a yam’e ‘Mas Strea ku tin den Shelu’.
Streanan manera Dibo Doran, Pachi Damon, Finchi Statia, Percy ‘Boskwiri’ Benita, Germain ‘Ma Yeta’, Elmer ‘Better Deals’ Riedel, Joharvi ‘Chokoi’ Ricardo, Etmund ‘Mc Monti’ Girigoria, Edion ‘Loloi’ Booy, Juni Karpinté, Solirenne ‘Pòpchi Soli’ Henrietta, Yadira ‘Cachita’ Bislick, Anni ‘La Loca’, Armando Huerta, Dwight de Windt i Hubert ‘Juny’ Aniceta.

‘Un Komedia Show’
E obra humorístiko lo ta un ‘komedia show’, paso e lo bai tin partisipashon di vehíkulonan motorisá, un agrupashon musikal, 16 aktor, 14 figurante, 1 stage manager i 3 tres asistente.
Un show chistoso ku un durashon di tres ora, ku no ta kontené palabra malu i ku ta drai rondó di falsedat, intriga, chantahe, egoismo, manipulashon, redashi, plaka, poder i fama.
E obra ta duna bo den un forma chistoso i dramatisá un bista relashoná ku dia di inskripshon, nochi di Festival di Tumba, final i koronashon di ‘Rei di Tumba 2017’.