WILLEMSTAD.- En konekshon ku selebrashon 40 aña grupo komedia Elouisa (ántes Arte Proba) lo bai tin e 5 último funshonnan di e komedia titulá: Ta Mi Kacho Bobi T’e Sinbèrgwensa?
Riba dianan: Djadumingu 29 aprel dòbel funshon: 300pm i 8:00pm, djaluna 30 aprel funshon lo ta 9:00pm i djamars 1e mei dòbel funshon 3:00pm i 8:00pm.
Bin disfrutá di un komedia humorístiko ku lo pone bo den suspenso, alabes dibertido pa loke ta trata e historia impreshonante ku ta wòrdu interpretá.
Ta un hòmber yama Wili  ku no ta gusta traha, pero haragan pa kome, e ta stens riba su supuesto namorada, ku ta traha komo kria na un kas.
E ta konfundí tur hende ku krusa den su kaminda, ku su monólogo ku nunka ta yega na un fin
E ta drenta di porta di patras, kaminda e kria ta traha, yena su barika tur santu dia, anochi e ta slùip drumi den kamber di e kria, i eksigí mitar di e namorada su salario.
E ta inteligente, sa kon manipulá, asta dilanti wes e ta logra sali liber riba sierto sospecho ku tin riba dje.
Nan ta konfundié ku un kachó brabu, ku el a mata yama Bobby pa un gangster ku ta karga e mesun nòmber Bobby den korte pa motibu di asesinato.
Un komedia humorístiko skibi i dirigí pa Anthony Jamanika, presentá pa grupo di komedia Elouisa, den Teatro Luna Blou.
Buska bo karchi na Mensing Caminada, 24 Uur Uit de Muur i na takia di Luna Blou.
Pa reservashon: 462-2209 òf 5676717.