WILLEMSTAD- Den un kòmbersashon ku nos di Den Bembe a sostené ku e presidente di AMAK Manfred Gomes el a trese dilanti, ku aña pasa e partisipashon di e banda Buleria a trese un balor adishonal na e festival di tumba pa loke ta fanátiko for di Aruba.

Esaki ta lokual ku ofisina di turismo di Kòrsou tambe a konfirmá, esta ku apesar di e mal momentu ku InselAir tabata pasando aden ku kanselashon di diferente buelo, tòg por a nota un kresementu di e kantidat di hende den red carpet i kual vários di e hendenan aki tabata di Aruba.

Riba nos pregunta ku si e portanan a habri outomátikamente pa bandanan di tantu Aruba komo BES i òf Ulanda por partisipá den festival di Tumba 2018, señor Gomes a trese dilanti ku esei e no por disidí. Ta e miembronan durante reunion general ku e tema di festival di tumba por disidí esaki.

Ta e miembronan por bisa i pone kua ta e kondishonnan ku e agrupashon musikalnan di e otro partinan den Reino por partisipá. E mes ta kere ku lo no tin opstákulo pero ta reunion ta disidí i no direktiva sin mas. Direktiva ta ehekutá e mandato di miembronan. Un kos ta sigur ku partisipashon di Buleria den Festival di Tumba di e aña aki a yuda e festival 2017. Pa loke ta 2018 nos di Den Bembe tin entendí ku Buleria tin hopi interes pa ta un biaha mas den nos Festival di Tumba.