WILLEMSTAD.- Negoshi den propiedat inmóbil ta e área komersial ku kisas ta esun di mas aktivo aktualmente na Kòrsou. Tantu kompra, desaroyo, benta komo hür di propiedatnan inmóbil ta hopi gustá. E kresementu di e sektor turístiko ta motibu prinsipal pa esaki, Chesron Isidora ta duna di konosé den e podcast 3’or ku Gino.

Isidora a traha mas ku 30 aña den sektor bankario i tabata direktor na banko di desaroyo, Korpodeko. Aktualmente e ta doño di su propio kompania SCADIA Associates ku ta hasi trabou di intermediario entre desaroyadónan i bankonan.

E ta mustra ku Kòrsou ta pasando den un kresementu ekonómiko ku no a mira durante último 40 aña òf mas. E kresementu aki ta okashoná pa e sektor turístiko. Un di aktividatnan prinsipal ku e kresementu aki ta trese kuné ta konstrukshon. Isidora ta bisa ku ta mira tambe kantidat grandi proyekto di konstrukshon na Kòrsou.

Ta trata aki tantu di proyektonan grandi, komo esnan mas chikí. “Tin masha hopi proyekto chikí na K`orsou di konstrukshon di entre 5 pa 10 kas, konstrukshon di Airbnb i resort chikitu. E tipo di proyektonan ta hopi gustá aktualmente.

E aktividatnan aki ta trese alabes otro moveshonnan ekonómiko kuné, e asina yamá efekto multiplikadó. Esaki ta servisionan ku mester duna ora ta risibí kantidat grandi di bishitante manera, limpiesa, transporte, i gastronomia, pero tambe diferente tipo di fishi. Pero e tin efektonan negativo tambe.

Unu ta ku preis di propiedatnan inmóbil ta subi i bira práktikamente impagabel pa hendenan lokal. Isidora ta konfirmá esaki bisando ku ta bèrdat un di e efektonan di e kresementu ta ku e preis ta subi. “E ta un realidat ku ta bini huntu ku un merkado ku ta krese, i e reklamonan ku tin riba oumento di preis ta bálido.”

El a mustra ku na Kòrsou ta merkado liber tin kaminda ta oferta i demanda ta determiná e preis. Pregunta pa Isidora ta si e situashon aki lo keda pa semper. Algu ku e ta duda pasobra ta un siklo ta pasa den dje.

“Den e siklo aki preisnan ta subi i despues e ta stabilisá. Ta kaso pa merkado ahustá i alkansá e desaroyo aki pa asina e preisnan bira pagabel atrobe.” E ta mustra ku ta pa hopi aña tabata anhelá un kresementu na Kòrsou manera ta mira aktualmente, pero ku e kresementu aki ta trese su kambionan kuné.

E ta mustra mas aleu ku ta desaroyadónan ta kore riesgo ku nan invershon ku nan ta hasi  i ta purba di saka un ganashi máksimo. Ta bai pa otronan ku ta haña aksesibilidat pa tòg por kumpra un kas. Aki Isidora ta mira un ròl pa gobièrnu pa yuda e poblashon, meskos ku gobièrnu mester sòru pa kaya i otro partinan di infrastruktura pa medio di invershonnan di kapital no konsumptivo.