WILLEMSTAD.- ‘DEN E BEMBE’ durante di wikènt a risibí e informashon ku tin gruponan di Karnaval no a kobra nan premio ainda.

Durante di nochi di premiashon a otorgá un kantidat di chèk simbóliko na gruponan ku a gana premio. Awor ta resultá ku gruponan a risibí informashon ku nan tin ku “warda un ratu” i ku lo yama pa konfirmá ki dia por pasa pa risibí chèk pa bai kobra e premio efektivo ku a keda otorgá na e gruponan.

Ta di lamentá ku esaki ta sosodé, pasó esaki ta di tres aña siguí ku organisashonnan enkargá ku organisashon di Karnaval lo no por kubri nan gastunan di organisashon.

‘DEN E BEMBE’ te ku último a komprondé ku ainda Gobièrnu tin ku kaba di pone nèt algu mas ku 100 mil florin pa MEO kubri e gastunan di 2015. Coridja Stars tambe tabata pendiente pa kaba di paga un montante ku ta bou di 100 mil florin ku tabatin habrí ounke ku a presentá meskos ku MEO tur dokumentashon korespondiente i ámbos tabatin reportahe finansiero firmá dor di un akountent.

Awor ta AGKK ta den e mesun situashon. Ban spera ku esaki lo por wòrdu resolvé.