WILLEMSTAD.- Mirando desaroyonan relashoná ku Corona Virus (Covid-19), Fundashon Bon Intenshon i International Film Festival Rotterdam (IFFR) lamentablemente a disidí di kanselá e edishon di e aña akí di Curaçao IFFR (CIFFR).
Ta duel nos di mester kompartí e notisia aki ku boso. Ta pa promé biaha ku ta kanselá CIFFR for di 2012. Ultimo dianan ta notisia mundialmente di kon lihé e Corona Virus(Covid-19) ta plama. Nos no por premirá kon esaki ta sigui ekspandé i ki konsekuensia esaki tin pa salubridat.
World Health Organization i RIVM (RijksInstituut voor Volksgezondheid en Milieu) ta konsehá pa kanselá eventonan grandi kaminda tin aglomerashon di hende, pasó esaki por tin komo konsekuensia ku ta plama e vírus muchu mas tantu. Fundashon Bon Intenshon i IFFR ta sigui e maneho akí.
Nos ta lamentá esaki masha tantu mes, mas ainda pa e públiko fiel di nos, nos invitadonan, empresanan lokal i nos partnernan ku ta koperá ku CIFFR, ku pa e motibu akí e festival no por tuma lugá.
Nos ta konta ku bo komprenshon den esaki i ta pidi bo pa pregunta òf eventual aklarashon pa tuma kontakto ku: Percy Pinedo: percy@curacaoiffr.com (CIFFR bosero - Willemstad) òf Jenny Canters: j.canters@iffr.com (IFFR PR Manager - Rotterdam).