WILLEMSTAD.- Despues di un wikènt di presentashon na Aruba ‘DEN E BEMBE’ a kombersá ayera ku Randal Corsen riba su presentashon durante di ‘Casibari Jazz Festival’.
E promé edishon di e festival a tuma lugá wikènt ku ta tras di lomba na Aruba. Randal Corsen a indiká ku nan a risibí un trato fantástiko dje organisashon i e trato tabata bon.
‘For di e promé momentu ku Erik Eman a aserká mi tur kos a kana masha ‘smooth’. Na Aruba tur kos a kana nechi.
CAS DI CULTURA
Randal huntu ku su músikonan a yega Aruba djárason anochi. ‘Djaweps mi tabatin un presentashon na Cas di Cultura pa un grupo di muchanan di skol básiko. E presentashon aki m’a hasié huntu ku Dibo D. Tabata hopi leuk i e muchanan a reakshoná hopi bon.
ENSAYO
Djaweps i djabièrnè Randal i su grupo di músiko a ensayá paso nan a keda reforsá pa un ‘string quartet’ di Aruba, ounke e cellista si ta di Kòrsou. Manuela Rios a bai pa reforsá e ‘string quartet i Tania Kross a djòin e grupo na Aruba.
HONOR
‘Tabata un honor pa ta un dje ‘headlinernan’ dje festival. Mi a toka na tres edishon anterior di ‘Caribbean Jazz Festival’, e aña aki nan a organisá e evento mas chikí, pero esei no a hasi e evento ménos spesial. E sitio tabata un mágiko, e tarima ku den ‘background’ e ‘Casibari Rock Formation’. Ambiente durante di tur dos anochi tabata masha dushi mes, cozy, íntimo i ku bon ‘vibe’.
JAM
Djabièrnè anochi Randal huntu ku Pernell Saturnino a subi i ‘jam’ ku e banda di Michael Bremo huntu ku entre otro Serghio Jansen, músikonan fenomenal di Aruba.
PRESENTASHON
‘E presentashon a bai hopi bon. Reakshonnan ta hopi bon. Mi a keda kontentu ku e públiko a sinta atento skucha, pa gran parti anto den un ‘setting’ di festival semper ta buta ku hendenan ta kana bai bin, papia hopi i e atenshon pa e muzik no tur ora ta 100%. Pero durante nos presentashon nan a buta stul dilanti stage, hendenan tabata sinta skucha i disfrutá. Nos a toka basta piesa trankil tambe i tabatin espasio pa esei. Natural nos a sera butando tur hende riba pia pa balia tumba’.
SAKA KARA
Randal Corsen tabata masha kontentu ku e presentashon di su músikonan. ‘Mi músikonan di promé ora, Pernell, Eric i Lonte a saka kara i e ‘string quartet’ a kaba di korona e obra. Orguyoso di por a toka ku Tania Kross, un yu di tera ku nivel internashonal. Tania no ta stòp di impreshoná mi ku su stèm, ‘loep’ zuiver, su profeshonalismo i su karisma. E públiko a keda impreshoná kuné i great ta ku Tania ta adaptá na tur género, pues nos por a trese un ‘cross over’ di muzik klásiko, jazz i muzik folklóriko di Kòrsou.
Dibo D tambe a hasi mi hopi orguyoso. Konosí na Aruba komo kantante den género popular, mi ta kere hopi hende no sa òf a yega di mir’e den otro género. Dibo a hasi hopi bon papel kantando e ‘mix’ ku mi a trese di muzik di Kòrsou i Jazz’.
Finalmente un Randal Corsen super satisfecho ta bek na Kòrsou i ta kla pa sigui buska oportunidat pa saka kara di Kòrsou na otro paisnan. Potrètnan kortesia Tito Laclé.