BARRANQUILLA.- “Deporte tin un realidat den dje. “Ta kon nos por pensa di bin gana hopi medaya na Colombia?”, esei segun pregunta ku Taffy de Jongh a hasi den entrevista ku EXTRA.

E manager di nos selekshon di sòftbòl ta hopi skèrpi. Despues di a sinta mira e final di sòftbòl ayera nochi den kua Pto. Rico a gana di Mexico, e ta bisa di tin hopi rèspèt pa su hungadónan pa e manera ku nan a batayá kontra di ámbos ekipo. Tur dos ta konta ku vários sòftbolista profeshonal. Pero e ta puntra su mes si ta algu normal pa a pensa ku nos lo por a yega i bati e ekiponan ei.

Pa deporte en general, e ke hasi un apelashon riba tur hende pa tene kuenta k’e echo ku pa un periodo di algun aña nos deporte en general a keda ekskluí. Un banda pa motibu di no por a tuma parti na kampionato internashonal pasobra e respektivo federashonnan no tabatin rekonosimentu, pero tambe pa motibu dje aspekto finansiero. “No tin sèn, nos no ta invertí den deporte”.

El a asentuá ku den tipo di kosnan asin’aki no mester krea espektativa falsu. “Ta un nivel hopi haltu nos a bin topa aki den e diferente disiplinanan. “Esnan ku a papia tokante bin gana vários medaya, nos tin ku despensá nan pasobra nan no sa kiko nan ta papia”.

De Jongh ta di opinion ku awor ku nos a mira e realidat kon den diferente ramo di deporte otronan a bai laga nos, ta bon pa tene kabes friu i hasi un evaluashon kon pa ban traha riba nivel di deporte den nos pais.