WILLEMSTAD.- Ku hopi antisipashon e kantante Tahir ta lansa e remix di ‘Einan’, e promé ‘single’ di su debut álbum,  ku e famoso DJ Puto X. Despues ku Tahir a firma ku BuzzBin Productions, e hóben talentoso ta trahando riba e álbum ku e ta spera di lansa mas den fin di aña.
Fo’i 2014, Tahir ta kultivando su karera komo solista i a lansa vários single pa tèst e awanan. Na 2015, Tahir a lansa "Mi Konfeshon", un kolaborashon ku Rafik, siguí pa "Un anochi di Tarraxinha", su promé ‘single’ komo solista. Na 2017, el a lansa e balada "Amor de Madre" i e Kizomba "Einan". 2018 tabata un aña yen di akontesimentu pa Tahir, unda el a kolaborá ku produktor MB Ghettoflow riba "Eres Tu" i tambe a traha ku e talentoso produktor Lange Sjaak riba e remix. Tambe, Tahir ta kanta den Kizzme, una banda di Kizomba ku ta kombiná e influensianan kaboverdiano i kurasoleño i ta presentá na papiamentu, spañó, ingles i creole kaboverdiano. Na aprel nan ta spera di lansa nan ‘single’ 'Club Domina'.
Tahir debe palèt musikal amplio na e diversidat kultural di Kòrsou i su famia, ken a eksponé na un variedat di ritmo musikal. E tin raisnan dominikano di parti di su mama i a lanta skuchando artistanan mané Romeo Santos, Daddy Yankee i Wisin y Yandel. Partikularmente ku Kizomba, e baile seduktor originá fo’i Angola, el a konektá paso e ritmo ta lag’é kòrda e ritmonan Karibense baliabel mané Reggae, Kadans i Zouk.
Ku 18 aña, Tahir a drenta e grupo di góspel di Reggaeton yamá "Los 3scogidos", pero e grupo a kibra na 2012 ora vários miembro a kuminsá  muda pa eksterior pa kontinuá nan estudio. Aktualmente, Tahir ta biba na Ulanda unda e ta studio Ingenieria Sivil.

Einan Remix
E kolaborashon entre Tahir i DJ Puto X a keda establesé via di un konosí, ken a drenta den kontakto ku e famoso produktor franses angoles pa introdusié na e talento kurasoleño. Despues di algun tempu ku Tahir i DJ Puto X tabata komuniká regularmente, nan a disidí di traha riba algun produkshon huntu.
E promé kolaborashon ta e remix di ‘Einan’. DJ Puto X a gusta e ‘vibe’ di e kantika asina tantu ku e kier a pone su toke angoles riba dje. Asina DJ Puto X a krea un ‘beat’ nobo segun su estilo pa e remix,  i asta a haña e oportunidat pa kanta riba e kantika. E resultado ta un produkshon di Kizomba ku ta primintí di ta un hit riba e listanan musikal internashonal.
Ku ‘Einan’, Tahir ta ekspresá su sintimentunan pa un amiga, unda e ta splik’é durante un baile intenso di Kizomba, kon e ta deseá di tin e pa semper den su brasa nan.  E ta invit’é pe baila kuné pa asina nan konektá ku otro.
Pa graba e produkshon, Tahir a bai Fransia na novèmber 2018 pa traha ku DJ Puto X. Na Paris, nan tabata tin algun seshon di skibimentu i a drenta studio pa krea e remix i e otro produkshon ku ta bai sali den futuro. “E seshon di studio tabata hopi great i produktivo i e konekshon entre nos tabata asina evidente. Ami a gusta su ‘vibe’ i e a gusta esun di mi”, Tahir a splika.
Keda pendiente pa otro produkshonnan ku Tahir tin ku DJ Puto X ku ta na kaminda.
Pa mas informashon siguí Tahir riba ritnan sosial na e página di Facebook/BuzzBinProductions of mail na Media@buzzbinproductions.com pa mas informashon.