LONDRES.- E hóben futbolista yu di Kòrsou Tahith Chong a yega Birmingham City, ku e temporada aki ta hür e serka Manchester United. Chong (21) promé ku el a bai ainda a risibí un mensahe di parti di e tékniko Ole Gunnar Solskjaer di The Red Devils.

E trainer noruego a partisipá na Chong ku lo e vigil’é den Chammpionsip ( 2da divishon di Inglatera). E hóben ta kontentu ku e por a start su preparashon ku United, ounke ku e transferensia di hür ya tabata kla. “Ta bunita di por tuma nota ku ainda mi ta den pensamentu di e trainer”, segun e delantero a bisa na prensa.

Pa Chong ta su di tres periodo di hür despues di Werder Bremen i Club Brugge. “Bo ta siña vários kos serka e klupnan ei. Serka Bremen a start bon, pero despues nan a kambia e sistema i mi no a hunga mas. Ora ku Club Brugge a yega, mi tabata entusiasmá. Tabatin ‘ups and downs’. M’a hunga bon den algun partido, pero despues mi tabatin e sentimentu ku por tabata mas mihó”.

Pero Chong tin bon rekuerdo pa e echo ku el a hunga pa e título nashonal na Bèlgika. “Esei tabata un eksperensia bunita ku Werder Bremen. “Mi por usa e eksperensianan ei serka Birmingham”.

Juventus ta hur Pjaca ku Torino

ROMA.- Juventus pa di sinku biaha ta hür Marko Pjaca ku otro ekipo. E ekipo via di su kanalnan ofisial ta duna di konosé ku e delantero di 26 aña e temporada nobo lo hunga ku Torino. Segun prensa italiano, Torino tin un opshon di kompra te 5 pa 6 mion euro i e ekipo ta obligá pa laga Pjaca hunga sierto kantidat di wega.

Juventus den zomer di 2016 a paga 23 mion pa tuma Pjaca over for di Dinamo Zagreb. Pero e delantero no por a kumpli ku tur loke a spera di dje na Turin. Den su promé temporada ainda el a hunga binti wega, pero den su di dos aña ya e no tabata den weganan ofisial. Despues e ekipo a hür e ku Schalke 04 i Fiorentina, pa despues e regresá Juventus. Despues di un wega, nan a mand’e pa Anderlecht.          Por último, den servisio di Genoa, Pjaca a hunga 38 wega ofisial i a skor 3 gol i duna 2 assists.

MARKO PJACA

Chelsea trahando riba Jules Koundé

LONDRES.- Chelsea ta den kombersashon ku Jules Koundé, defensa di 22 aña. Chelsea ta negoshando ku e ekipo spañó Sevilla pa Kounde por muda pa Inglatera. Aparentemente Koundé te hasta tin un akuerdo personal ku Chelsea pa un kontrakt te medio 2026. E klupnan ta den negosiashon avansá riba e transferensia.

Segun kontrakt di Koundé, e ekipo ku ta deseá su servisionan lo mester paga 80 mion euro na Sevilla. Vários ekipo ta interesá, pero un di nan sigur, Tottenham Hotspur, no tin chèns pa motibu ku Kounde ke hunga Champions League. Ku Chelsea i Manchester United e por hasi esei, miéntras ku Tottenham a klasifiká solamente pa bueltanan di playoff di Conference League.

JULES KOUNDE