WILLEMSTAD – Djárason 4 di òktober último  a tuma lugá un evento ofisial den Arkadentheater na Universidat di Mannheim, Alemania. E anochi tabata organisá pa profesor Dr. Eva Eckkrammer huntu ku studiantenan di fakultat Lingwístiko ku a bishitá Kòrsou e aña aki. Invitado spesial di e anochi tabata e kantante kurasoleño Tamara Nivillac ku a duna un tremendo konsierto den su lenga materno papiamentu.

Dr. Eva Eckkrammer ta profesor di Lingwístika i medionan di komunikashon na Universidat di Mannheim na Alemania. Den añanan 90 el a hasi un investigashon sientífiko na Kòrsou i Aruba i a doktorá na 1994 ku un tésis tokante e ròl di tradukshon literario pa lenganan minoritario (manera papiamentu).

Durante su estadia i investigashon na Kòrsou Dr Eckkrammer a krea un amor i konekshon inmenso pa ku nos idioma papiamentu, nos kultura i pais. P’esei na òktober di aña 2016 el a invitá  señora Ingrid ‘Ini’ Statia for di Kòrsou pa bin Mannheim pa asina duna un kurso intensivo na su studiantenan dje fakultat ku tabata interesá pa siña e idioma papiamentu. Un grupo di mas o ménos 25 studiante a sigui e kurso i denter di korto tempu a siña skirbi i papia papiamentu.

Na aprel di e aña aki e studiantenan a bishitá Kòrsou durante un biahe di estudio, inisiativa di Prof. Dr. Eckkammer. Huntu ku señora Statia, Prof. Dr. Eckkammer a hinka un programa kultural intensivo hopi konosementu di arte, kultura i historia di nos pais. Nan a bishitá entre otro diferente museo, hardin di yerba di Dinah Veeris, galeria di Yubi Kirindongo i tambe nan hasi un bishita na Parlamento di Kòrsou.

Djárason 4 di òktober 2017 e studiantenan ‘bou di guia di nan profesor a organisá un evento den Arkadentheater na Universidat di Mannheim den forma di un eksposishon i presentashon kaminda nan a kompartí ku un públiko grandi tur loke nan a siña, mira i eksperensiá durante nan biahe pa Kòrsou.

Klousura di e anochi tabata na enkargo di e kantante kurasoleño Tamara Nivillac akompañá riba kitara pa otro yu di tera Stanley Clementina. E kansion “Hello” di Adele ku Tamara a tradusí na Papiamentu na 2016 tabata e promé kansion ku e studiantenan a skucha na Papiamentu i nan promé kontakto i impreshon di e idioma durante e kurso ku nan a sigui.

P’esei tabata hopi spesial pa e  studiantenan ku Tamara tabata tei presente i ku el a deleitá nan ku entre otro su propio kansionnan na papiamentu. Inolvidabel tabata e momentu final kaminda henter e sala a kanta na bos haltu e refran di e kansion klásiko i bunita na papiamentu, ‘Atardi’.