WILLEMSTAD.- E kantante kurasoleño, Tamara Nivillac ta lansa un kantika dediká

spesialmente na mamanan rònt mundu titulá ‘Mama’. E videoclip di ‘Mama’ a keda produsí pa talentoso Ryan “QD” Navarro, kual a keda grabá durante Tamara su estadia kuminsamentu di aña na Kòrsou. Riba dia di mama, Tamara lo bai tin un konsierto di mama aya na Ulanda titulá “A Mother’s Love”.
Despues di un temporada sin a lansa produkshonnan propio, Tamara ta bèk ku un kantika nobo riba merkado ku e mes a komponé. Mama ta un palabra universal ku tin e mesun nifikashon den kasi tur lenga i esei ta hasié aún mas spesial i fuerte. E kantika ‘Mama’ ta dediká na promé lugá su mes mama i alabes na mamanan rònt mundu i tambe n’esnan ku no ta mama biológiko pero ku sí a tumá na nan enkargo e ròl importante i poderoso akí. Tamara ke ekspresá su gratitut pa tur e sakrifisionan ku nos mamanan a hasi, pa asina nos por ta e personanan ku nos ta awe den komunidat. Pa Tamara tur dia ta dia di mama i p’esei e no ta mira e kantika akí komo un kantika eksklusivo pa e selebrashon, pero komo un homenahe i agradesimentu na mamanan henter aña.
Pa e partí di areglo musikal, Tamara a kolaborá pa promé biaha ku e músiko i produktor Elbert Jozefa, ku no ta deskonosí den e farándula lokal. Elbert a traha riba diferente produkshon i hitnan di artistanan lokal manera entre otro Aemy NiaFeliz i tambe Heinrich ‘Richie Rich’ Pieters. Tambe e ta miembro i areglista di e grupo di Seú HPA, ku tur aña ta hasi un aporte grandi na nos kultura den entre otro Kantadó Mayó. Tamara a kolaborá tambe riba e kantika akí ku e talentoso kantante i rapper Sherman Smith. Sherman ta un hóben ku pa un tempu kaba a bini ta hasi furor ku su kantikanan den e género urbano na Kòrsou.
Tamara ke gradisí Arcas BV i Avila Beach Hotel pa nan aporte pa realisashon di e proyekto akí i tambe na e tremendo visagista, Diantha Rodrigues Pereira di Didicakes i Brauhaus pa su toke final.
E kantika ‘Mama’ ta kai den e género di ‘World Music’, ku ya pa algun tempu kaba Tamara a bini ta eksperimentando kuné i e ta den su lenga materno, Papiamentu. Tamara mes ta referí na e su músika komo ‘Caribbean Soul’. Den kuadro di lansamentu di e kantika akí, Tamara lo bai tin un evento den e konsepto di ‘Food & Concert’ na Ulanda titulá ‘A Mother’s Love’.
E evento lo tuma lugá na Teatro Mooi Weer & Zo, na Rotterdam riba djadumingu 12 di mei 2019, ku ta riba dia di Mama. Den un ambiente ameno i íntimo, e kantante lo duna homenahe na tur mama, kompañá pa un banda 'live' unda e lo kompartí su historianan personal. Durante e konsierto akí, su single nobo ‘Mama’ lo keda interpretá pa promé biaha.
Chèk riba www.tamaranivillac.com, pa mas informashon di benta di karchi. E kantika ‘Mama’ lo ta disponibel riba entre otro Spotify, iTunes, Apple Music, Deezer i tur demas plataforma di músika online i e videoclip ya ta disponibel riba YouTube. Por siguí Tamara riba ritnan sosial na www.facebook.com/TamaraNivillac of Instagram@tamaranivillac.