WILLEMSTAD.- Djadumingu awor 7 di yanüari 2018 di 5’or pa 11’or pm, grandioso tambú di Dumingu di Tres Rei na Museo di Tambú Shon Cola na Sabana Baka 31. Animashon musikal ta na enkargo di Zoyoyo i su Grupo ku Mistica Stefania i Papi Cadeau ku su grupo di tambú di Zjaro. Tela tambe lo tei kla prepará pa ora Roni yam’é.
E aña akí Museo di Tambú Shon Cola ta dediká e aktividat na Norma ‘Kariñoso’ Gosepa i Freddy Gabiël, ‘Freddy Mato’. Dos gran kantadó di tambú di felis memoria.
Dumingu di Tres Rei ta un dia masha spesial den tradishon di tambú na Kòrsou. Den e promé mitar di siglo pasá hendenan di Bándariba tabata kore paranda di tambú den trùk di palu bai Bándabou for di mainta tempran i tabata regresá atardi pa sigui ku e paranda den nan propio bario te 12’or djanochi. Di e forma ei nan tabata selebrá tambú di Dumingu di Tres Rei i terminá e temporada di tambú.
Den e temporada akí tambú di Bándariba tabata tuma lugá na kas di hende. Por kòrda tambúnan na kas di Mosa na Roi Indjan, Enda, Polin Bòn Bòn, Mosa di Janbos, Mario di Juan di Nene, Ursulita, Graciëla, Maria Daal, Chencha, Klup Santa Rosa, Bin Bo Bul’aden, Kobitu, Famia Pichon, Via di Yandi, Fincho Nanoy, Atala, Tan Sera, Strea den palu, Famia Josephina, Chè di Zjaro, Bar di Monrepos i hopi mas.
Djadumingu awor dia 7 di yanüari Museo di Tambú Shon Cola ta ripití e grandioso fiesta tradishonal di Dumingu di Tres Rei ku animashon di Grupo Zoyoyo, Papi Cadeau i su Grupo di tambú di Zjaro i Tela Sambo.
Bo ta gusta mira, balia, skucha, kanta i toka tambú? Bo ta gusta e dushi ambiente di un bon barí? Bo ta keda kordialmente invitá. Tur amante di tambú i amantenan di kultura di Kòrsou ta bon biní serka René na Museo di Tambú Shon Cola. Entrada ta grátis.
Fundashon Stripan na vanguardia di marka di Kòrsou. Un pueblo tin derechi riba su kultura.