WILLEMSTAD.- Tariq Hooi ayera nochi a keda koroná komo Rei di Tumba Hubenil 2017 despues ku el a gana e ‘battle’ entre e i eks Rei di Tumba 2015, Denzell Gregg.
Un total di 10 partisipante ayera a kompetí den Festival di Tumba Hubenil 2017. Despues di a hasi nan promé presentashon, hurado a skohe 6 kantante ku a sigui pa e di dos rònt, pa despues di esaki skohe 2 kantante ku a bai un ‘battle’, entre dos pa saka finalmente e Rei di Tumba Hubenil.
‘DEN E BEMBE’ a tuma nota di masha hopi remarke i opservashon riba retnan sosial i nos ta lamentá ku AGKK no a supervisá kada un dje organisashonnan ku nan a duna un dje eventonan ku a keda organisá na nòmber di AGKK. Den nos edishon di mañan nos lo duna mas atenshon na loke ku a sosodé i ku sigur tin basta hende indigná pa e manera ku e organisashon di Festival di Tumba Hubenil 2017 a tuma lugá.

Premiashon
Premio estímulo a bai pa Naemy Kirindongo. Latisha Constancia a keda premiá komo di kuater finalista, siguí pa Deneesha Thomas komo di tres finalista i premio pa mihó bos. Charlson “Sontje” Mercelina a keda premiá komo di dos finalista i tambe mas popular. Denzell Gregg a keda premiá ku e premio di promé finalista. E ganadó apsoluto a resultá Tariq Hooi. E komposishon ganadó a gana e premio komo “Mihó Komposishon”.