DENVER, MERKA.- E kantante, Taylor Swift a gana e huisio sumario ku el a entamá kontra di un presentadó di televishon ku lo mester a mishi ku su atras sin outorisashon.
E presentadó awor lo tin ku paga Swift e montante simbóliko di 1 dòler.
Despues di 4 ora di deliberashon e 8 miembronan di e hurado a duna e kantante rason djaluna último.
E insidente a tuma lugá despues di un konsierto ku Swift a presentá na Denver na 2013. Despues di su aktuashon e kantante a ‘pose’ pa saka potrèt ku su fanátikonan i invitadonan, entre nan e presentadó di radio, David Mueller.
E strea di pop, den su testimonio a sigurá ku e presentadó a tene na su atras bou di su paña. Mueller kende tabata konosí pa su oyentenan komo ‘Jackson’, a keda saká dje lugá pa e personal di seguridat. E ekipo do siguridat di Swift a informá e doñonan di trabou di Mueller kende despues di dos dia a pèrdè su trabou.
E kantante a pidi un multa simbóliko segun su abogadonan, esaki pa demostrá na e muhénan ku ta posibel pa entamá kaso kontra di abuso seksual.
Mueller na 2015 a demandá e kantante pa e montante di 1 mion dòler, esaki akusando e kantante i su tim di a hasi deklarashon falsu kontra di su persona ku a pone ku el a pèrdè trabou. Djabièrnè último hues a indiká kaba ku no por kulpa Swift di ta e motibu ku Mueller a pèrdè su trabou.
Manera e sentensia a bira konosí, fanátikonan di Swift a subi retnan sosial pa felisitá e kantante ku e logro.