WILLEMSTAD.- Sin duda un bon debut ayera dje atleta yu di Kòrsou Taymir Burnet den kampionato mundial di atletismo na Qatar komo atleta individual. Burnet ayera a subi pista 2x pa kore distansia di 100m i a klasifiká pa semi final ku ta kore awe mainta.

Manera Mundu Deportivo a publiká anteriormente, e team di relevo 4x100m di Hulanda ta konsistí di yunan di Kòrsou i adishonalmente Burnet a risibí ‘wild card’ pa 100m i a klasifiká riba 200m individual.

Den kareda preliminar p’esnan ku a haña ‘wild card’, Burnet a gana e promé kareda ku un tempu di 10.23. Ku esei el a  gana derechi pa kore den ‘heat’. El a kai den e promé ‘heat’ i a drenta na di 4 puesto ku tempu di 10.21. E ganadó tabata un ruso ku 10.01.

Pa determiná ken ta pasa pa semi final a apliká e sistema ku e promé 3 atletanan di kada ‘heat’ ta sigui i huntu ku nan e 6 mihó tempunan. E yu di Kòrsou ku esei a resultá den e grupo di seis atleta ku tambe por pasa pa semi final.

Awe mainta pa 11:45 Burnet lo ta riba pista den semi final. E ta den e promé ‘heat’ i ta nr. 2. Bon pa menshoná ku den su grupo tin no ménos ku 4 atleta ku tempu bou di 10 sekònde. Esaki ta inkluí e norteamerikano Christian Coleman ku 9.79.

En total den e diferente ‘heats’ semi final tin no ménos ku 14 atleta ku e aña’ki a para oloshi bou di 10 sekònde.