WILLEMSTAD.- Dia 7 di mart Team Kingdon of the Netherlands lo hunga su promé wega di World Baseball Classic. Sur Korea ta e promé kontrinkante riba kaminda pa e meta final: E título mundial.

Den e selekshon di Hensley Meulens tin un kantidat di pelotero ku ya kaba a yega di saboriá e título komo kampion di mundu. Ta trata di esnan ku den 2011 tabata na Panamá.

Fanátikonan di beisbòl sigur lo no lubidá e título di 2011. Na Panamá e delaster sero a keda saká pa Jonathan Schoop. Rob Cordemans tabata  a habri e wega ku a konta ku hungadónan hopi hóben manera Xander Bogaerts, Didi Gregorius, Dwayne Kemp, Diegomar Markwell, Shairon Martis, Kalian Sams, Sharlon Schoop, Curt Smith, Tom Stuifbergen, Juan Carlos Sulbaran, Orlando Yntema i Shawn Zarraga. Esei ya ta mitar dje aktual selekshon.

World Series

Ofisialmente gana World Series den MLB no ta meskos ku e título mundial, pero tòg ku tur derechi e pelotero por bisa ku e ta kampion. Pa e motibu ei por bisa ku Xander Bogaerts den 2013 (Red Sox) i manager Hensley Meulens den 2010, 2012 i 2014 (San Francisco Giants) dje forma ei tabata entre e mihónan di mundu

Awor e World Series di 2004? Fanátikonan di Boston Red Sox lo grita dirèkt ku ta nan ekipo.

Pero no, di e aña ei ta referí na e título World Series di Little League, ganá pa Kòrsou. Un ekipo ku a yega e Seri Mundial despues di a titulá kampion di Karibe.

Den e Serie Mundial, Pablo Little League di forma invikto a titulá kampion internashonal, vensiendo e.o. Chinese Taipei ku semper ta e gran faborito.

Pero den Little League World Series bo ta kampion mundial te ora ku bo gana dje kampion merikano tambe. Anto e aña ei Kòrsou a derotá Thousand Oaks di California.

Tantu Jurickson Profar komo Jonathan Schoop a hunga un papel importante den e wega ei. Profar na 3ra i Schoop komo SS. Profar a bati homerun i despues Schoop a subi picha pa konserva bentaha di 5-2 pa Kòrsou gana e Seri Mundial.

Pero Profar, Schoop, Chris Garia i otronan no tabata e promé team kampion mundial di Kòrsou. Dos aña promé tabata e team Senior League ku a kue e título na Bangor, Maine.

Sharlon Schoop, Curt Smith, Jair Jurrjens i Shairon Martis tabata den e ekipo ei.

Por bisa ku 16 dje aktual 28 peloteronan (57%) di e ekipo di Reino Ulandes tin un título mundial riba nan nòmber. Awor nan tur huntu dia 22 di mart ta deseá di por pone un otro korona riba nan kabes.