WILLEMSTAD.- ‘Teatro di pueblo. Kiko ta bo solushon?’ ta un obra teatral produsí dor di Instituto Buena Bista ku dia 26 di aprel pa 7’or di anochi lo keda presentá na Fundashon F.E.L.I.S.
E meta di e obra teatral ta pa huntu ku e muchanan, nan famia i bisiñanan di F.E.L.I.S. reflehá riba e desbalansenan sosial ku nan ta konfrontá diariamente den nan bida sea direktamente o indirektamente.
E obra interaktivo ta duna e muchanan e oportunidat pa den forma di wega pensa riba e posibel solushonnan.
E artista invitá, Elke Uitentuis huntu ku e studiantenan di Instituto Buena Bista – Curaçao Center for Contemporary art – a desaroyá e idea pa e obra teatral ‘Teatro di pueblo. Kiko ta bo solushon?’
Fundashon F.E.L.I.S. ta un ‘naschoolse opvang’ den Otrabanda.
‘Teatro di pueblo. Kiko ta bo solushon?’ ta un obra teatral interaktivo inspirá riba 1 dje téknikanan di ‘Theatre of the Oppressed’. E téknika ta pa e duna e públiko e hèrmèntnan nesesario pa huntu pensa riba e desbalansenan sosial ku nan ta konfrontá diariamente den nan bida sea direktamente o indirektamente. Ta ser spera ku e públiko ta tuma parti aktivamente den e obra i pa huntu yega na solushonnan ku ta keda konfrontá durante dje obra.
‘Teatro di pueblo. Kiko ta bo solushon?’ ta keda presentá riba djaweps, 26 di aprel 2018 pa 7’or di anochi na sede di Fundashon F.E.L.I.S. situá na Witteweg # 44, dilanti di Brasami na Otrobanda. Entrada ta grátis.