WILLEMSTAD.- Den wikènt di 1, 2 i 3 di novèmber 2019, Teatro KadaKen ta presentá e delaster 3 funshonnan di e obra teatral Chakutoe na La Tentashon. Durante di un periodo di 8 luna Teatro KadaKen a presentá Chakutoe pa aproksimadamente 3000 persona. Chakutoe ta un obra di krítika sosial di un periodo den historia di Kòrsou ku no sa haña masha atenshon. Tumando e wèlga di den haf na 1922 bou di guia di Felix Chakutoe komo punto di salida, e obra ta trata algun tema universal den un kuadro históriko, sosial i kultural.
Chakutoe ta hiba bo bèk na e Kòrsou di 1922. Haf di Kòrsou tabata den bonansa i e gruponan di poder tabata prinsipalmente interesá den kresementu di ekonomia, defendiendo interes di e kompanianan di barku. Pero e situashon a bira eksplosivo, ora e kompanianan a redusí salario di e trahadónan di haf drástikamente.
Nos ta biba e historia mirando kondishon di bida di famia Hendriksen-Schilder. E yu hòmber Tirso ke ta un lider. Hesus i Tula ta su inspirashon, e gusta lesa i resa, pero e no por logra di haña su mes kaminda. Ora su ruman muhé Magdalena mustra di ta un lider real, Tirso ta hañ’é ta skohe … E ta konform’é na norma di sosiedat, òf e ta sigui su propio bos interno?
Gibi Bacilio, ku tin un trayektoria largu den teater na Kòrsou a skibi i dirigí e obra akí. Bacilio ta demostrá su mahestria lagando e aktornan hunga diferente personahe, dunando nan chèns di mustra nan diferente talentonan. No solamente aktor ku mas eksperensia manera Norma Cova i Albert Schoobaar, pero tambe esnan mas hobén, Tisjaira Martina, Guenn Ramon Gustina i Andruw Macaria ta demostrá esaki.
Ta bende karchi pa Chakutoe na Mensing's Caminada, Van den Tweel Zeelandia i online: https://tibbaa.events/chakutoe Pa mas informashon: teatrokadaken.org òf yama 569-8417/672-4580.