MERKA.- Tego Calderón a rabia pasó su fanátikonan tabata graba su presentashon ku telefòn, e artista no a gusta i a kuminsá zundra ku palabra malu i hasi moveshonnan fo’i òrdu riba stage.
E situashon aki a presentá durante di un presentashon di Tego Calderón na Houston. E videonan ku a ser grabá di e akto di Tego a keda poné riba retnan sosial i bo por a nota ku e artista tabata bastante rabiá ku e situashon.
E komportashon di Tego a generá un kantidat di opinion di su siguidónan, tin hopi ta apoy’é inkondishonal, pero tin otro nan ku no ta kontentu ‘at all’ ku loke a sosodé i nan a ekspresá esaki riba retnan sosial. ‘No bin Houston nunka mas, nos a paga pa wak bo. Nos tabata emoshoná i ba laga nos ku man bashí. Bo mester organisá bo mes mas mihó i si bo mester di yudansa, buska!’, eseinan tabata algun dje komentarionan ku a keda buta riba retnan sosial. Fanátikonan ku a bin di otro siudat pa wak Tego tambe a keda bastante rabiá pe situashon ku a presentá. E artista mes no a duna niun komentario riba loke a sosodé.