WILLEMSTAD.- Miéntras ku trabou ta sigui pa Kòrsou organisá un dje mihó edishonnan di CARIFTA, e organisashon North American Central and Caribbean Athletics Association (NACAC AA) ta sigui manda su téknikonan pa inspekshoná kon e preparashon ta desaroyá.

Manera ta konosí, e kompetensia regional di atletismo ta tuma lugá di 15 pa 17 di aprel aki na Kòrsou.

Resientemente dr. Lorde di Barbados tabata na Kòrsou pa kontrolá e preparashonnan pa ku e kontrolnan riba doping.

Fin di siman tras di lomba, tabatin dos otro representante di NACAC. Esaki tabata Prof. Garth Gayle (Jamaica) komo Organizational delegate i Conrad Francis (Grenada) komo Technical delegate. Esaki tabata sr. Gayle su di tres bishita, despues di ougùstùs 2016 i novèmber 2016. Sr. Francis tambe tabat’ei den novèmber 2016.

Na e bishita aki nan a inspektá atrobe e stadion di SDK. Djasabra último tabatin un reunion ku e dirigentenan di e Komité Organisador StOA pa pasa riba e detayenan di e organisashon.

Pa un kasualidat e bishita di kòntròl tabata pareu ku e evento “Meet & Greet” ku mas ku 200 boluntario di Carifta. Gayle i Francis tambe a presensiá esaki, i a duna mensahe enfokando riba e importansia di Carifta Games pa tantu atletismo komo tambe turismo na Kòrsou.

Ku e inspekshon eksitoso aki, e Komité Organisadó ta un paso mas serka na e evento grandísimo aki. Aworakí falta 5 siman pa Kòrsou risibí 27 pais ku mas ku 500 atleta.