PANAMA CITY.- Un temblor di magnitut 7.7 riba eskala di Richter, a sakudí Panamá riba e djabièrnè aki 9 di òktober. A sinti e temblor hopi fuerte den algun zona di siudat di Panamá, kaminda a evakuá vários edifisio den e zona bieu i zona bankario komo medida di prekoushon.

Manera indiká ta trata di un temblor di magnitut 7.7 ku a sakudí e parti ‘zuidoost’ di Panamá, na un profundidat di 10 kilometer, segun e Servisio Geológiko merikano. Segun e rapòrt di USGS, e episentro tabata na 12 kilometer di Tonosí, un lokalidat den e parti sùitwèst di Panamá, i na mas o ménos 239 kilometer di e kapital di Panamá. E temblor a tuma lugá pa 12:56 di mèrdia, ora lokal. Den promé instante a reportá un magnitut di 7.6, pero despues USGS a aktualisá esaki na 7.7.

Den e último lunanan, vários pais di Latinoamérika a eksperensia temblornan di gran magnitut. Tur hende por kòrda esun na Venezuela, dia 24 di yüni último, e dia ei dos temblor di magnitut 7.2 i 7.5 a tuma lugá, unu tras di otro. Nan a kousa destrukshon grandi na La Guaira, na mas o ménos 30 kilometer di Caracas. Segun e último rapòrt ku gobièrnu di Venezuela, e temblornan a laga por lo ménos 6.509 morto, 14.239 kas ku daño moderá i 11.001 kas ku daño grave.

Na Colombia, riba e mainta di 10 di ougùstùs, un temblor di magnitut 7.4 a afektá 500 munisipio den 16 departamento, esta mitar di e 32 departamentonan di e pais. Un total di 486.917 persona, pertenesiendo na 303.934 famia, a sufri algun tipo di daño òf konsekuensia. Segun e outoridatnan kolombiano, 335 persona a muri i 4.516 a keda heridá.